सेतू कार्यालयातील अपहार प्रकरणातील दोषींवर कडक कारवाई करणार ! – शंभूराज देसाई

सातारा, २८ ऑगस्‍ट (वार्ता.) – येथील सेतू कार्यालयातील अपहारप्रकरणी तहसीलदारांकडे अनेक तक्रारी प्राप्‍त झाल्‍या आहेत. याची सखोल चौकशी करून तहसीलदारांनी जिल्‍हाधिकारी जितेंद्र डुडी यांच्‍याकडे अहवाल दिला आहे; मात्र जिल्‍हाधिकारी सुटीवर असल्‍यामुळे १५ दिवस होऊनही यावर कोणतीही कारवाई झालेली नाही. जिल्‍हाधिकारी आल्‍यानंतर तात्‍काळ दोषींवर कडक कारवाई करण्‍यात येईल, अशी माहिती राज्‍य उत्‍पादन शुल्‍कमंत्री तथा पालकमंत्री शंभूराज देसाई यांनी दिली.

नियमाप्रमाणे ठेकेदाराने ऑनलाईन सुविधेचा उपयोग करून सर्व नोंदी शासनाच्‍या पोर्टलवर करून द्यायच्‍या आहेत. सातारा तहसील कार्यालयातील ठेकेदार आस्‍थापन ‘सार्.आय.टी. रिसोर्सेस’ यांनी जुलै २०२२ ते जून २०२३ या कालावधीत प्रतिज्ञापत्रांच्‍या नोंदी केल्‍या; मात्र अनधिकृतपणे आणि नियमभंग करत या नोंदी ऑनलाईन न करता ऑफलाईन पद्धतीने केल्‍या. यामुळे शासनाची १४ लाख ७१ सहस्र रुपयांची हानी झाली असून या रकमेचा ठेकेदार आस्‍थापनाने अपहार केल्‍याचे स्‍पष्‍ट झाले आहे. याविषयी ठेकेदार आस्‍थापन आणि सातारा तहसीलदार यांच्‍यावर कारवाई करण्‍याची मागणी पत्रकार पद्माकर सोळवंडे यांनी जिल्‍हाधिकार्‍यांकडे केली होती.