गुरुवर्य पू. संभाजी भिडेगुरुजी यांना सतत विशेष सुरक्षाव्यवस्था द्यावी !

श्री शिवप्रतिष्ठान हिंदुस्थान लांजाच्या वतीने प्रशासनाला निवेदन

लांजा, २४ जुलै (वार्ता.) –  १६ जुलै २०२३ या दिवशी घाटकोपर (मुंबई) येथे गुरुवर्य पू. संभाजी भिडेगुरुजी यांची सभा होती. ते कार्यक्रम स्थळी पोचताच ४ समाजकंटक त्यांच्या गाडीच्या आडवे आले आणि त्यांनी गाडी रोखण्याचा प्रयत्न करून घोषणाबाजी केली. केवळ वैयक्तिक द्वेषापोटी समाजा-समाजात तेढ निर्माण होईल, असे वातावरण जाणीवपूर्वक निर्माण केले जात असल्यामुळे शांतता अन् सुव्यवस्था यांना बाधा पोचण्याची शक्यता लक्षात घेऊन समाजकंटकांकडून अनुचित कृत्य घडू नये, या कारणास्तव आदरणीय पू. संभाजी भिडेगुरुजी यांना राज्यात आणि महाराष्ट्राबाहेरही विशेष सुरक्षाव्यवस्था द्यावी, अशी विनंती येथील श्री शिवप्रतिष्ठान हिंदुस्थानच्या वतीने निवेदनाद्वारे प्रशासनाकडे करण्यात आली. २४ जुलै या दिवशी येथील तहसीलदार प्रमोद कदम यांना हे निवेदन देण्यात आले. या वेळी श्री शिवप्रतिष्ठान हिंदुस्थानचे धारकरी  आणि सकल हिंदु समाजाचे कार्यकर्ते उपस्थित होते.

प्रशासनाला दिलेल्या या निवेदनात म्हटले आहे की, ४ समाजकंटकांना अटक करून पोलिसांनी कार्यतत्परता दाखवली, याविषयी पोलिसांचे अभिनंदन ! हिंदुत्वनिष्ठ विचार म्हणजे जातीयवादी विचार मानणार्‍या अनेक व्यक्ती, संघटना आदरणीय गुरुजींना वेळोवेळी अकारण विरोध करत असतात. गुरुजींचे विचार पूर्णपणे जाणून न घेता त्यांच्या विचारांवर त्वरित विरोधी मतप्रदर्शन करत असतात. नुकताच घडलेला प्रसंगही अशाच प्रकारचा होता. असे काही कृत्य करून समाजात जातीय तेढ निर्माण करण्याचा तो एक प्रयत्न होता. हे प्रसंग घडवून कुणीतरी स्वत:ची राजकीय पोळी भाजून घेण्याचा प्रयत्न तर करत नाही ना ? अशी शंका येते.