ग्रामसेवकाला लाच घेतांना पकडले !

नगर – येथील तक्रारदार शेतकरी यांनी शासनाच्या गाय गोठा योजनेअंतर्गत अनुदानासाठी पंचायत समिती कर्जत (जिल्हा नगर) येथे प्रकरण सादर केले होते; मात्र हे प्रकरण संमत करून देण्यासाठी चांदे खुर्द येथील ग्रामसेवक ओंकार आवटे यांनी तक्रारदाराकडे ७ सहस्र रुपयांची मागणी केली. यातील प्रथम ५ सहस्र रुपये द्यावेत आणि काम झाल्यानंतर उर्वरित २ सहस्र रुपये देण्याचे सांगितले. या संदर्भातील तक्रार लाचलुचपत प्रतिबंधक विभागाला प्राप्त झाल्यावर त्यांनी सापळा रचून ५ सहस्र रुपयांची लाच स्वीकारतांना आरोपीला पकडले. मिरजगाव येथील पोलीस ठाण्यात या प्रकरणी गुन्हा नोंद केला आहे. नागरिकांनी कोणताही शासकीय अधिकारी-कर्मचारी किंवा त्यांच्या वतीने कुणीही खासगी व्यक्तीने शासकीय काम करून देण्यासाठी लाचेची मागणी केल्यास संपर्क साधण्याचे आवाहन नगर येथील भ्रष्टाचारविरोधी पथकाने केले आहे.