महामार्गावर ‘चिपलुन’, ‘पेन’ असे अशुद्ध भाषेत गावांच्या नावांचे फलक !

रत्नागिरी – अनेक वर्षांपासून मुंबई-गोवा राष्ट्रीय महामार्गावरील चौपदरीकरणाचे रखडलेले काम चालू आहे. या महामार्गावर जागोजागी महामार्गाचे अंतर आणि त्या त्या ठिकाणाची ओळख सांगणारे फलक उभारले जात आहेत; परंतु या फलकांवर शहरांची नावे चुकीच्या पद्धतीने लिहिली जात आहेत. चिपळूणचे ‘चिपलुन’ किंवा पेणचे ‘पेन’ असे नामफलक काही ठिकाणी आहेत.

मराठी भाषा जतन करण्यासाठी अनेक प्रयत्न चालू असतांना महामार्गावर मात्र मराठीची मोडतोड केल्याचे दिसून येत आहे. मराठी भाषेचा अभिमान असणारे, राजकीय पक्षांचे लोकप्रतिनिधी किंवा पदाधिकारी यांनी याविषयी महामार्ग विभागाच्या प्रशासकीय अधिकार्‍यांना जाब विचारायला हवा, अशी अपेक्षा मराठीप्रेमींकडून व्यक्त केली जात आहे.