रुग्णवाहिकेमधून देशी दारूची वाहतूक करणारे कह्यात !

नगर – सरकारने संचारबंदीचे नियम अधिक कडक केल्याने पोलीस अनेक ठिकाणी नाकाबंदी करून वाहनांची तपासणी करत आहेत. संगमनेरमध्ये नाकाबंदीच्या ठिकाणी शहर पोलीस तेथे तपासणी करत होते. एक रुग्णवाहिका सायरन (भोंगा) वाजवत आली असता ‘रुग्ण नसतांनाही सायरन का वाजवतो ?’, अशी पोलिसांनी विचारणा केली. चालक गोंधळल्याने पोलिसांना शंका आली आणि त्यांनी अधिक तपासणी केली. त्या वेळी रुग्णवाहिकेतून देशी दारूची अवैध वाहतूक केली जात असल्याचे उघड झाले. या प्रकरणी चालक विजय फड आणि त्याचा साथीदार कैलास नागरे या दोघांना कह्यात घेतले आहे. या वेळी पोलिसांनी ५ खोकी देशी दारू आणि रुग्णवाहिका असा सवा दोन लाख रुपयांचा मुद्देमाल शासनाधीन केला.