आमदार अपात्रता प्रकरणी काँग्रेसचे चोडणकर यांनी प्रविष्ट (दाखल) केलेली याचिका उच्च न्यायालयाने फेटाळली

गिरीश चोडणकर

पणजी, १६ जानेवारी (वार्ता.) – काँग्रेसमधून बंडखोरी करून भाजपमध्ये आलेल्या १० आमदारांच्या संदर्भात जुना आदेश कायम ठेवत काँग्रेसचे गिरीश चोडणकर यांनी ८ आमदारांच्या संदर्भात प्रविष्ट (दाखल) केलेली याचिका उच्च न्यायालयाने फेटाळली आहे. सप्टेंबर २०२२ मध्ये काँग्रेसचे दिगंबर कामत, आलेक्स सिक्वेरा, संकल्प आमोणकर, रुडॉल्फ फर्नांडिस, मायकल लोबो, डिलायला लोबो, केदार नाईक आणि राजेश फळदेसाई या ८ आमदारांनी वेगळा गट करून भाजपमध्ये प्रवेश केला होता. या ८ आमदारांना अपात्र ठरवण्याविषयी गिरीश चोडणकर यांनी सभापती रमेश तवडकर यांच्याकडे याचिका प्रविष्ट केली होती. त्यानंतर सभापती रमेश तवडकर यांनी त्यांची याचिका फेटाळून लावली होती. सभापती रमेश तवडकर यांनी दिलेल्या या आदेशाला गिरीश चोडणकर यांनी उच्च न्यायालयात आव्हान दिले होते. सर्वाेच्च न्यायालयात या प्रकरणाच्या सुनावणीच्या वेळी सभापतींच्या आदेशाच्या विरोधात घटनेच्या कलम १३६ अंतर्गत याचिका प्रविष्ट करण्यात आली होती. कलम १३६ नुसार सर्वाेच्च न्यायालयात या प्रकरणी सुनावणी करू शकत नाही, असे सर्वाेच्च न्यायालयाने स्पष्ट केले होते. त्यानंतर त्यांनी चोडणकर यांना कलम २२६ नुसार उच्च न्यायालयात जाण्याचे निर्देश दिले. यानुसार चोडणकर सर्वाेच्च न्यायालयाच्या सूचनेनुसार गिरीश चोडणकर यांनी उच्च न्यायालयात याचिका प्रविष्ट केली होती.