राममंदिर वर्गणीच्या नावाखाली खंडणी वसुलीचा काँग्रेसचे आमदार लहू कानडे यांचा आरोप 

मनसे आणि भाजप यांच्या कार्यकर्त्यांकडून कानडे यांचा निषेध

लहू कानडे

नगर – अयोध्येत उभारण्यात येत असलेल्या राममंदिरासाठी वर्गणीच्या नावाने भाजपचे पुढारी खंडणी गोळा करीत आहेत, असा आरोप काँग्रेसचे श्रीरामपूरचे आमदार लहू कानडे यांनी केला. कानडे यांच्या वक्तव्याचा हिंदुत्वनिष्ठ संघटनांकडून निषेध करण्यात आला. श्रीरामपूरमधील श्रीराम मंदिर चौकात मनसे आणि भाजप यांच्या कार्यकर्त्यांनी एकत्र येत कानडे यांचा निषेध केला. कानडे यांच्याविरुद्ध गुन्हा नोंद करण्याची मागणी करण्यात आली आहे. पोलीस उपअधीक्षक संदीप मिटके यांना यासंबंधीचे निवेदन देण्यात आले. कानडे यांनी क्षमा मागावी, अशी मागणीही करण्यात येत आहे.

राहुरी तालुक्यातील देवळाली प्रवरा येथे काँग्रेस कार्यकर्त्यांचा मेळावा आयोजित करण्यात आला होता. त्या वेळी बोलतांना कानडे यांनी हा आरोप केला. माजी मंत्री राधाकृष्ण विखे पाटील यांच्यावरही त्यांचे नाव न घेता कानडे यांनी टीका केली आहे.