निगडी पोलीस ठाण्यातील पोलीस उपनिरीक्षक विकास शेळके याला अटक !

पिंपरी-चिंचवड येथे अमली पदार्थ सापडल्याचे प्रकरण

पिंपरी-चिंचवड : येथे ‘मेफेड्रोन’ हा अमली पदार्थ सापडल्याच्या प्रकरणी निगडी पोलीस ठाण्यात कार्यरत असणारा पोलीस उपनिरीक्षक विकास शेळके याला अटक करण्यात आली आहे. १ मार्चच्या पहाटे येथे २ कोटी रुपयांचे मेफेड्रोन सापडले होते. या प्रकरणी सांगवी पोलिसांनी नमामी झा या हॉटेल कामगाराला अटक केली होती. पोलिसांकडून शेळके यांच्या अटकेची गुप्तता पाळण्यात आली आहे. पिंपरी-चिंचवड पोलिसांनी आणखी ४३ किलो ‘मेफेड्रोन’ जप्त केले आहे. आतापर्यंत कह्यात घेतलेल्या अमली पदार्थाचे एकूण मूल्य ४५ कोटी इतकी आहे. या जाळ्याची व्याप्ती मोठी असण्याची शक्यता वर्तवली जात आहे.