‘सायकल फेरी’ काढून जिल्हा प्रशासनाने केली जनजागृती !

पर्यावरणपूरक गणेशोत्सव साजरा करा !

रत्नागिरी – ‘पर्यावरण पूरक गणेशोत्सव साजरा करा’, ‘स्वच्छ, सुंदर आणि हरित रत्नागिरी’ हा संदेश घेवून जिल्हा प्रशासन अन् पोलीस प्रशासन यांनी ३ सप्टेंबर या दिवशी ‘सायकल फेरी’ काढून जनजागृती केली. पोलीस कवायत मैदानात हिरवा झेंडा दाखवून जिल्हाधिकारी एम्. देवेंदर सिंह आणि जिल्हा पोलीस अधीक्षक धनंजय कुलकर्णी यांनी या सायकल फेरीचा शुभांरभ केला. या फेरीचा प्रारंभ श्री गणेशमूर्तीला पुष्पहार अर्पण करून करण्यात आला.

या वेळी परिविक्षाधिन आय.एस्. अधिकारी डॉ. जस्मिन, निवासी उपजिल्हाधिकारी चंद्रकांत सूर्यवंशी, जिल्हा अधीक्षक कृषी अधिकारी सुनंदा कुर्‍हाडे, अन्य अधिकारी, रत्नागिरी सायक्लिस्ट क्लबचे दर्शन जाधव, महेश सावंत आदी उपस्थित होते.
या प्रसंगी जिल्हाधिकारी एम्. देवेंदर सिंह म्हणाले, ‘‘जिल्ह्यात मोठ्या उत्साहात गणेशोत्सव साजरा केला जातो. हरित रत्नागिरी, स्वच्छ रत्नागिरी, सुंदर रत्नागिरी हे ३ उद्देश घेऊन पर्यावरणपूरक असा गणेशोत्सव साजरा करावा, याविषयीची जनजागृती व्हावी, यासाठी ३० कि.मी.ची सायकल फेरीचे आयोजन करण्यात आले आहे. अधिकारी, कर्मचारी यांनी स्वत:चे आरोग्य, स्वास्थ्य चांगले ठेवण्याचा संदेशही या सायकल फेरीच्या माध्यमातून देत आहोत.’’

पोलीस अधीक्षक धनंजय कुलकर्णी म्हणाले, ‘‘कोकणामध्ये गणेशोत्सव दिमाखात साजरा केला जातो. सायकल चालवणे, हा पर्यावरणपूरक असा उपक्रम असल्याने सायकल फेरीच्या माध्यमातून जनतेला या वर्षीचा गणेशोत्सव पर्यावरणपूरक करण्याचा संदेश देऊ या.’’

पोलीस कवायत मैदानातून या फेरीला प्रारंभ होऊन मारुति मंदिर-गोडावून स्टॉप-आर्.टी.ओ. ऑफीस-कुवारबाव-रत्नागिरी ग्रामीण पोलीस ठाणेमार्गे परत कुवारबाव-मारुति मंदिर-जयस्तंभ-रामआळी-गाडीतळ-टिळक आळी-काँग्रेस भुवन-आठवडा बाजारमार्गे परत पोलीस कवायत मैदान येथे या फेरीची सांगता झाली. या सायकल फेरीमध्ये सहभाग घेणार्‍यांना मान्यवरांच्या हस्ते प्रमाणपत्र देऊन गौरवण्यात आले.