अंबरनाथ येथील ग्रंथाभिसरण मंडळाच्या अमृतमहोत्सवी वर्षानिमित्त कार्यक्रम

‘ज्ञानदीप’ संस्थेकडून ग्रंथालयास विविध उपक्रमांची आकस्मित भेट !

अंबरनाथ (जिल्हा ठाणे) – येथील ग्रंथाभिसरण मंडळ या शासकीय अनुदानित सार्वजनिक वाचनालयाच्या माजी ग्रंथपाल सौ. श्रावणी फाटक यांनी ग्रंथाभिसरण मंडळाच्या अमृतमहोत्सवी वर्षानिमित्त वाचनालयास त्यांच्या ‘ज्ञानदीप’ या संस्थेकडून विविध उपक्रम राबवून त्याची आकस्मित भेट दिली.

येथील शिवसेनेचे माजी नगराध्यक्ष, ‘अंबर भरारी’ या संस्थेचे संस्थापक अन् कार्यक्रमाचे प्रायोजक सुनील चौधरी, शतायु ग्रंथालयांचे प्रतिनिधी वक्ते ठाणे मराठी ग्रंथसंग्रहालयाचे अध्यक्ष विद्याधर ठाणेकर आणि वाचन मंदिर, भिवंडी ग्रंथालयाचे मिलिंद पळसुले , जिल्हा ग्रंथालयाचे अधिकारी प्रशांत पाटील, ग्रंथाभिसरण मंडळाचे अध्यक्ष श्री. प्रवीण मथुरे, कार्यवाह श्री. रवींद्र हरहरे या कार्यक्रमासाठी विशेष निमंत्रित म्हणून, तर कोकण मराठी साहित्य परिषदेचे अध्यक्ष प्रदीप ढवळ हे कार्यक्रमाचे अध्यक्ष होते.

या कार्यक्रमाला उपस्थित प्रमुख पाहुणे आणि अंबरनाथमधील विविध सामाजिक संस्थांचे पदाधिकारी यांचा सत्कार करतांना त्यांना सनातनचे ग्रंथ भेट देण्यात आले.

विद्याधर ठाणेकर यांनी या वेळी ग्रंथालयांची वाचकसंख्या वाढवण्यासाठी त्यांनी राबवलेल्या अत्यंत परिणामकारक आणि यशस्वी उपाययोजनांविषयीची माहिती दिली. मिलिंद पळसुले यांनी भिवंडीत मराठी ग्रंथालय चालवतांना येणार्‍या समस्या मोकळेपणाने मांडल्या.

सुनील चौधरी आणि डॉ. प्रदीप ढवळ यांनी श्रावणी फाटक राबवत असलेल्या विविध उपक्रमांचे कौतुक करून त्यांना प्रोत्साहन दिले.
या कार्यक्रमाला २५० हून अधिक ग्रंथप्रेमी उपस्थित होते.

लक्षवेधी

• कु. कल्याणी फाटक हिने स्वागतगीत म्हटले.

• संगीत विशारद श्री. चैतन्य फाटक यांनी ईशस्तवन आणि अन्य गीते सादर केली.

• अर्धा कार्यक्रम झाल्यावर ‘जय जय महाराष्ट्र माझा’ हे ध्वनीमुद्रित राज्यगीत ऐकवण्यात आले. त्या वेळी सर्व जण उठून उभे राहिले. त्या वेळी वातावरणात एक वेगळेच चैतन्य जाणवत होते आणि उपस्थितांत उत्साह जाणवत होता.