पिंपरी (पुणे) येथे मतदारांनी नेत्यांसमोर फलकाद्वारे उपस्थित केले प्रश्न आणि समस्या !

राजकीय नेत्यांनी मतदारासांठी काय केले ?

पिंपरी (पुणे) – राज्यात विधानसभा निवडणुकीची धामधुम चालू आहे. सर्वत्र चुरशीच्या लढती आहेत. पिंपरी विधानसभा मतदारसंघातून राष्ट्रवादी काँग्रेसचे अण्णा बनसोडे निवडणुकीच्या रिंगणात उतरले आहेत; परंतु पिंपरीतील सजग मतदारांनी त्यांच्या संबंधित काही प्रश्न उपस्थित केले आहेत. ते प्रश्न एका फलकाद्वारे (फ्लेक्सच्या) विचारण्यात आले आहेत. हा फलक मतदारसंघातील मुख्य रस्त्यावर लावण्यात आला आहे.

फलकाच्या माध्यमातून अण्णा बनसोडे यांना विचारण्यात आलेले प्रश्न !

महाराष्ट्र औद्योगिक महामंडळ (एम्.आय.डी.सी.) बळकट करण्यासाठी तुम्ही काय केले ? वाहतुकीची समस्या सोडवण्यासाठी तुम्ही काय केले ? जनतेचे प्रश्न सोडवण्यासाठी विधानसभेत किती लक्षवेधी मांडल्या ? मतदारसंघातील गुन्हेगारी अल्प करण्यासाठी तुम्ही काय केले ? कोविड काळात नागरिकांसाठी तुम्ही काय केले ? पाणीपुरवठा सुरळीत करण्यासाठी तुम्ही काय केले ?