विजयपुरा (कर्नाटक) : शेतकर्‍यांच्या भूमींनंतर आता हिंदु मठांच्या भूमीही ‘वक्फ’ मालमत्ता !

विजयपुरा (कर्नाटक) – जिल्ह्यातील सिंदगी शहरात विरक्त मठाची संपत्ती आता वक्फ संपत्ती बनली आहे. ‘सर्वे क्रमांक १०२०’मधील मालमत्तेला ‘वक्फ बोर्डा’ने कब्रस्तान म्हणून नोंदवले आहे. सिद्धलिंग स्वामीजी या मठाचे पीठाधिपती असतांना पहाणी कॉलम क्रमांक ११ रिकामे होते. वर्ष २०१८-१९ मध्ये रिकाम्या असलेल्या या क्षेत्राला ‘वक्फ बोर्ड’ म्हणून समाविष्ट केले गेले.

१३ व्या शतकात स्थापन झालेला मठ कब्रस्तान कसे बनले ? वक्फ बोर्डात १.२८ एकर मालमत्तेचा समावेश केल्याने मठाच्या भक्तांनी तीव्र विरोध करत संताप व्यक्त केला आहे. सिंदगी तालुक्यातील अनेक हिंदु मठांच्या मालमत्तेचा वक्फ बोर्डात समावेश झाला असावा, अशी शंका भक्तांनी व्यक्त केली आहे. वक्फ बोर्डात समावेश झाल्याची माहिती मिळाल्यानंतर भक्त आता संघटित होऊन विरोध करत आहेत.