US Indian Student Missing : अमेरिकेत आता आणखी एक भारतीय विद्यार्थी बेपत्ता !

रूपेश चंद्रा २ मेपासून शिकागो शहरातून बेपत्ता !

वॉशिंग्टन (अमेरिका) – अमेरिकेत गेल्या ६ महिन्यांपासून तेथे शिक्षणासाठी गेलेले अथवा भारतीय वंशाचे तेथेच वास्तव्य करणारे भारतीय विद्यार्थी यांच्यावर अनेक आक्रमणे झाली आहेत. या कालावधीत किमान ११ भारतीय विद्यार्थ्यांचा अमेरिकेत संशयास्पद मृत्यूही झाला आहे. अशीच एक घटना आता शिकागो येथे घडली असून एन् शेरीडन रोडच्या ४३०० ब्लॉकमधून रूपेश चंद्रा हा भारतीय विद्यार्थी २ मेपासून बेपत्ता आहे.

शिकागो येथील भारतीय वाणिज्य दूतावासाने म्हटले आहे की, भारतीय विद्यार्थी रूपेश चंद्राच्या बेपत्ता झाल्याची बातमी ऐकून महावाणिज्य दूतावास अत्यंत चिंतेत आहे. दूतावास भारतीय समुदाय आणि पोलीस यांच्या सतत संपर्कात आहे अन् लवकरच रूपेशचा शोध लागेल, अशी आशा आहे. शिकागो पोलिसांनी लोकांना आवाहन केले आहे की, जर त्यांना रूपेशविषयी काही माहिती मिळाली, तर ती पोलिसांना कळवावी.