‘ई.व्ही.एम्.’ यंत्राविषयी काँग्रेसला सर्वाेच्च न्यायालयाकडून चपराक ! – पंतप्रधान मोदी

सर्वोच्च न्यायालयाने ‘ई.व्ही.एम्.’द्वारे मतदान घेण्यात येईल, असे सांगत त्या विरोधातील सर्व याचिका फेटाळून लावल्या !

बेळगाव – काँग्रेसने कोरोना लस, ‘ई.व्ही.एम्.’ यंत्र यांच्याविषयी खोटी माहिती पसरवण्याचे काम केले आहे. भारताच्या यशाची त्यांना लाज वाटते. ‘ई.व्ही.एम्.’विषयी अफवा पसरवून काँग्रेसने एकप्रकारे भारताच्या लोकशाहीला अपकीर्त केले आहे. असे असले, तरी आता सर्वोच्च न्यायालयाने काँग्रेसला चांगली चपराक दिली आहे, असे वक्तव्य पंतप्रधान नरेंद्र मोदी यांनी केले. मालिनी सिटी येथे लोकसभा मतदारसंघातील भाजपचे उमेदवार जगदीश शेट्टर आणि चिकोडी मतदारसंघातील भाजप उमेदवार अण्णासाहेब जोल्ले यांच्या प्रचारार्थ २८ एप्रिलला आयोजित प्रचारसभेमध्ये ते बोलत होते.

१. छत्रपती शिवाजी महाराज यांनी शक्तीशाली भारताच्या निर्मितीसाठी त्यांचे जीवन व्यय केले, तर संत महात्मा बसवेश्वर यांनी आपल्यासाठी लोकशाहीचा रस्ता बनवला. गेल्या १० वर्षांत केंद्रातील भाजप सरकारने देशाला शक्तीशाली बनवले आहे. आता जगभरात ‘लोकशाहीची जननी’, अशी भारताची ओळख निर्माण झाली आहे.

२. न्यायसंहितेत सकारात्मक पालट करतांना आम्ही ब्रिटिशांचे अन्यायकारक कायदे हटवले आहेत. आता नवीन असलेल्या भारताच्या न्यायसंहितेत दंडाला नाही, तर न्याय मिळण्याला प्राधान्य दिले आहे. दुसर्‍यांवर अत्याचार करणार्‍यांसाठी आता कडक शिक्षेची तरतूद करण्यात आली आहे.