शिवभक्त महानंदा शिवासाठी नृत्य करतांना स्फुरलेली कविता !

‘वर्ष २०१३ मध्ये मला सूक्ष्मातून दिसले, ‘शिवभक्त महानंदाला शिवाचे दर्शन झाले. तिला आत्मज्ञानाची प्राप्ती होऊन ब्रह्मनाद ऐकू आला. तिला कृतज्ञतेपोटी पुढील काव्य स्फुरले.’ देवाच्या कृपेने माझ्याकडून तिचे चित्र रेखाटले गेले आणि तिच्या मनातील ही कविता माझ्या मनःपटलावर उमटली. त्याचे लिखाण मी केले. ‘ही कविता शिवचरणी अर्पण होऊन आम्हा साधकांवर शिवाची कृपा होऊ दे’, हीच प्रार्थना आहे.

ब्रह्मांडाला व्यापून राहिला हा ब्रह्मनाद ।
शिवशंकराच्या डमरूनादात ।
मिसळून गेला घुंगरांचा नाद ।
नंदीश्वराच्या शंखनादात ।
हरवून गेले माझे पैंजणांचे मंजूळ नाद ।। १ ।।

कैलासात सामावून गेला घंटानाद ।
संपूर्ण ब्रह्मज्योतीला व्यापून राहिला शिवनाद ।
शिवाच्या कृपेने ऐकू आला हा विजयनाद ।
ब्रह्मांडाला व्यापून राहिला हा ब्रह्मनाद ।। २ ।।

– सुश्री (कु.) मधुरा भोसले (आध्यात्मिक पातळी ६५ टक्के (वय ४० वर्षे), सूक्ष्मातून मिळालेले ज्ञान), सनातन आश्रम, रामनाथी, गोवा. (२४.२.२०२४)

सूक्ष्म : व्यक्तीचे स्थूल म्हणजे प्रत्यक्ष दिसणारे अवयव नाक, कान, डोळे, जीभ आणि त्वचा ही पंचज्ञानेंद्रिये आहेत. ही पंचज्ञानेंद्रिये, मन आणि बुद्धी यांच्या पलीकडील म्हणजे ‘सूक्ष्म’. साधनेत प्रगती केलेल्या काही व्यक्तींना या ‘सूक्ष्म’ संवेदना जाणवतात. या ‘सूक्ष्मा’च्या ज्ञानाविषयी विविध धर्मग्रंथांत उल्लेख आहेत.

सूक्ष्मातील दिसणे, ऐकू येणे इत्यादी (पंच सूक्ष्मज्ञानेंद्रियांनी ज्ञानप्राप्ती होणे) : काही साधकांची अंतर्दृष्टी जागृत होते, म्हणजे त्यांना डोळ्यांना न दिसणारे दिसते, तर काही जणांना सूक्ष्मातील नाद किंवा शब्द ऐकू येतात.