अयोध्‍या येथील श्रीराममंदिराच्‍या प्राणप्रतिष्‍ठा सोहळ्‍यास देशातून ५ लाख गावांतील भाविक उपस्‍थित रहाणार ! – मिलिंद परांडे, राष्‍ट्रीय महामंत्री, विहिंप

औरंगजेब हा या देशाचा आदर्श कधीच होऊ शकत नाही !

नागपूर – अयोध्‍या येथील श्रीराम मंदिराच्‍या उभारणीत देशभरातील अनुमाने ५ लाख ३४ सहस्र गावांचे योगदान आहे. साहजिकच या गावांसह संपूर्ण देशवासियांची जानेवारी २०२४ मध्‍ये आयोजित प्रभू रामचंद्राच्‍या प्राणप्रतिष्‍ठा सोहळ्‍यात उपस्‍थित रहाण्‍याची इच्‍छा आहे; पण अयोध्‍येत एकाच वेळी इतक्‍या लोकांची व्‍यवस्‍था करणे शक्‍य नसल्‍याने गावखेडी, तसेच शहर आणि महानगर यांसह प्रत्‍येक ठिकाणी कार्यक्रम आयोजित करण्‍याचा विचार चालू आहे, अशी माहिती विश्‍व हिंदु परिषदेचे राष्‍ट्रीय महामंत्री श्री. मिलिंद परांडे यांनी दिली.

ते पुढे म्‍हणाले की, जानेवारीमध्‍ये अयोध्‍या येथे प्रचंड थंडी असते. अनेकांना ही थंडी सहन होणारी नसते. कडाक्‍याच्‍या थंडीत किती लोकांचा बंदोबस्‍त करता येईल, यावरही विश्‍व हिंदु परिषद विचार करत आहे. काही गोष्‍टी देशभर होतील, काही कार्यक्रम अयोध्‍या येथे होतील. दर्शनाचा क्रम काय असू शकतो ? याचा विचार न्‍यास आणि विश्‍व हिंदु परिषदही करील. प्रत्‍येकालाच प्राणप्रतिष्‍ठा सोहळ्‍यात सहभागी होण्‍याचा आनंद मिळावा यासाठी हा कार्यक्रम संपूर्ण भारतात कसा करता येईल, याची आखणी करण्‍यात विहिंप गुंतली आहे.