‘शंभुदुर्ग प्रतिष्ठान’कडून आंदोलनाची चेतावणी, तर पोलिसांकडून हिंदुत्वनिष्ठांवर दबाव !

भिवंडी येथील वज्रेश्‍वरी मंदिराच्या पर्यवेक्षकपदी ख्रिस्ती व्यक्तीच्या नियुक्तीचे प्रकरण

ठाणे – भिवंडी येथील ऐतिहासिक श्री वज्रेश्‍वरी योगिनीदेवी संस्थानच्या पर्यवेक्षकपदी (‘सुपरवायझर’ पदी) फ्रान्सिस जोसेफ लेमोस या ख्रिस्ती व्यक्तीची नियुक्ती करण्यात आली होती. ही निवड तात्काळ रहित न केल्यास तीव्र आंदोलन करण्याची चेतावणी ‘शंभुदुर्ग प्रतिष्ठान’कडून देण्यात आली; मात्र यामुळे धार्मिक तणावाचे वातावरण निर्माण होण्याचा बागुलबुवा निर्माण करून पोलिसांकडून हिंदुत्वनिष्ठांवर दबाव आणण्याचा प्रयत्न करण्यात येत आहे.

‘पर्यवेक्षकपदी फ्रान्सिस जोसेफ लेमोस यांची नियुक्ती करण्याचा निर्णय १५ एप्रिलपर्यंत रहित न केल्यास २३ एप्रिल या दिवशी मंदिराच्या प्रांगणात आंदोलन करू’, अशी चेतावणी शंभुदुर्ग प्रतिष्ठानच्या वतीने वज्रेश्‍वरी देवस्थानला देण्यात आली आहे. याविषयी शंभुदर्ग प्रतिष्ठानकडून देवस्थानला पत्र पाठवण्यात आले आहे. मंदिरात येणारे देणगीदार, अतीमहत्त्वाच्या व्यक्ती आणि शासकीय अधिकारी यांचे स्वागत अन् पाहुणचार करणे, न्यायालयीन कामे करणे, देवस्थानच्या भूमींची पहाणी करणे, मंदिराच्या व्यवस्थापकांना सहकार्य करणे आदी दायित्व फ्रान्सिस जोसेफ लेमॉस यांच्याकडे सोपवण्यात आले आहे.

फ्रान्सिस लेमोस हे देवस्थानच्या वतीने करतात लाडूंची विक्री !

मंदिराच्या परिसरात भाविकांसाठी देवस्थानच्या वतीने प्रसाद म्हणून लाडूंची विक्री केली जाते. फ्रान्सिस लेमोस हे मागील ३० वर्षांपासून येथील देवस्थानच्या दुकानामध्ये लाडूंची विक्री करत आहेत. ते इतकी वर्षे काम करत असल्यामुळे त्यांना मंदिरामध्ये पर्यवेक्षकपदी नेमण्यात येत असल्याची माहिती एका विश्‍वस्तांनी दैनिक ‘सनातन प्रभात’च्या प्रतिनिधीला दिली.

मंदिराच्या पर्यवेक्षकपदी ख्रिस्ती व्यक्तीची निवड करणे, हे नवे धर्मसंकट ! – शंभुदुर्ग प्रतिष्ठान

शंभुदुर्ग प्रतिष्ठानने वज्रेश्‍वरी देवस्थानला लिहिलेल्या पत्रामध्ये म्हटले आहे, ‘‘ठाणे जिल्ह्यात ख्रिस्ती मिशनर्‍यांनी आदिवासी वस्त्यांमध्ये प्रार्थनास्थळे उभारून लोकांशी संपर्क वाढवला आहे. त्यांच्या संपर्कात येणारे हिंदु बांधव कालांतराने हिंदु धर्माला मानत नाहीत, तर काही लोक हिंदु धर्माचा त्यागही करत असल्याचे आढळून आले आहे. ख्रिस्ती मिशनर्‍यांकडून होणारे हिंदूंचे धर्मांतर रोखण्यासाठी अनेक हिंदुत्वनिष्ठ संघटना प्रयत्नरत आहेत. असे असतांना वज्रेश्‍वरी मंदिराच्या पर्यवेक्षकपदी ख्रिस्ती व्यक्तीची निवड करणे, हा हिंदु धर्मावर आणखी संकटे ओढवणारा निर्णय आहे.’’