हिंदु जनजागृती समितीच्या निःस्वार्थ सेवेविषयी विकल्प पसरवण्याचा अयशस्वी प्रयत्न !

हिंदु धर्मजागृती सभेत भाषण देण्यासाठी अवास्तव मानधन मागणारे कथित हिंदुत्वनिष्ठ वक्ते आणि त्यांचे समन्वयक यांच्याविषयी आलेला कटू अनुभव !

‘एका राज्यातील एका गावात एका हिंदुत्वनिष्ठ संघटनेने हिंदु धर्मजागृती करण्यासाठी एका सभेचे आयोजन केले होते. आयोजकांनी या सभेला वक्ता म्हणून हिंदुत्वाविषयी व्याख्याने देणारी एक प्रसिद्ध व्यक्ती आणि हिंदु जनजागृती समितीचे कार्यकर्ते अशा २ जणांना आमंत्रित करण्याचे ठरवले होते.

आयोजकांनी हिंदुत्वाविषयी व्याख्यान देणार्‍या प्रसिद्ध वक्त्यांना संपर्क साधला असता त्यांच्या कार्यक्रमांचा समन्वय पहाणार्‍या व्यक्तीने वक्त्यांनी सभेत भाषण करण्यासाठी ५१ सहस्र रुपये मानधनाची मागणी केली. यावर आयोजक संघटनेने २१ सहस्र रुपये देण्याची सिद्धता दर्शवली; पण त्यासाठी संबंधित वक्त्यांची सिद्धता नव्हती. त्यामुळे आयोजकांनी त्या वक्त्यांना न बोलावता एका सभागृहात ३००-४०० जणांच्या उपस्थितीत सभा घेण्याचे ठरवले.

आयोजकांनी प्रसिद्ध वक्त्यांच्या कार्यक्रमांचा समन्वय पहाणार्‍या व्यक्तीला ‘हिंदु जनजागृती समितीच्या वक्त्याने कार्यक्रमात विषय मांडण्यासाठी कशाचीही (मानधनाची) मागणी केलेली नाही’, असे सांगितले. तेव्हा प्रसिद्ध वक्त्यांच्या समन्वयकांनी समितीविषयी  ‘त्यांची संस्था मोठी आहे. त्यांच्या मोठमोठ्या कंपन्या चालतात’, अशा प्रकारचे उत्तर आयोेजकांना दिले. अशा प्रकारे वक्ता समन्वयकांनी हिंदु जनजागृती समितीविषयी चुकीची माहिती प्रसारित करून विकल्प पसरवण्याचा प्रयत्न केला.

या प्रसंगानंतर सभेच्या आयोजकांनी हिंदु जनजागृती समितीच्या कार्यकर्त्यांकडे संपर्क साधला. त्या वेळी त्यांनी सुप्रसिद्ध वक्त्यांच्या मानधनाविषयी आग्रही भूमिका घेण्याविषयी पुढील भावना व्यक्त केली, ‘या व्यक्ती सनातन धर्माचा प्रचार करत आहेत कि हिंदूंना लुटत आहेत ? आम्ही सभा स्वतःसाठी किंवा आमच्या कुटुंबासाठी घेत नाही, तर समाजाला जागृत करण्यासाठी आयोजित करत आहोत. पैशांना सर्वस्व मानणार्‍या या व्यक्तींच्या अनुभवातून वाटले की, भारत हिंदु राष्ट्र नाही, तर इस्लामी राष्ट्र बनेल; कारण मौलाना-मुसलमान त्यांच्या धर्माचा निःशुल्क प्रचार करतात.’