सनातन प्रभात > Post Type > बातम्या > राष्ट्रीय बातम्या > SC Verdict Bhojshala : मुसलमानांना दुपारी १ ते ३ वेळेत नमाजपठणासाठी अनुमती !

SC Verdict Bhojshala : मुसलमानांना दुपारी १ ते ३ वेळेत नमाजपठणासाठी अनुमती !

  • भोजशाळेत (मध्यप्रदेश) वसंतपंचमीच्या संदर्भात सर्वाेच्च न्यायालयाचा निर्णय

  • अन्य वेळेत हिंदू पूजा करू शकणार

नवी देहली : मध्यप्रदेशातील धार येथील भोजशाळेत २३ जानेवारीला वसंतपंचामीच्या दिवशी हिंदूंना संपूर्ण दिवस पूजा करण्याची अनुमती देण्याच्या मागणी सर्वाेच्च न्यायालयाने निर्णय दिला आहे. न्यायालयाच्या निर्णयानुसार २३ जानेवारीला भोजशाळेत सूर्याेदयापासून दुपारी १ वाजेपर्यंत पूजा, १ ते ३ नमाजपठण आणि नंतर पुन्हा सूर्यास्तापर्यंत पूजा करण्यास अनुमती दिली आहे. या संदर्भात ‘हिंदु फ्रंट फॉर जस्टिस’चे अधिवक्ता विष्णु शंकर जैन यांनी याचिका प्रविष्ट (दाखल) केली होती. २३ जानेवरीला शुक्रवार येत असल्याने आणि नेहमीप्रमाणे मुसलमान नमाजपठणासाठी येथे येत असल्याने या दिवशी पूर्ण दिवस हिंदूंना पूजा करण्यासाठी अनुमती देण्याची हिंदूंची मागणी होती.

‘हिंदु फ्रंट फॉर जस्टिस’ने वसंतपंचमीला भोजशाळेत केवळ हिंदूंनाच सरस्वती देवीची पूजा करण्याची अनुमती द्यावी आणि त्या दिवशी मुसलमानांना प्रवेश रोखावा, अशी मागणी केली होती. यावर मशीद समितीच्या वतीने अधिवक्ता सलमान खुर्शिद यांनी याचिकेला विरोध केला. याआधी ३ वेळा असे झाले असल्याने याचिका सुनावणीस पात्र नसल्याचे खुर्शिद यांनी सांगितले. दोन्ही बाजूंचे युक्तीवाद ऐकून न्यायालयाने हिंदु आणि मुसलमान दोन्ही पक्षांना पूजा आणि नमाजपठण करण्याची अनुमती दिली.

न्यायालयाने आदेशात नमूद केले की, मुसलमानांकडून नमाजपठणासाठी अंदाजे संख्या आजच जिल्हाधिकार्‍यांना दिली जाईल, जेणेकरून कायदा आणि सुव्यवस्था राखण्यासाठी प्रवेशपत्र देता येतील. दोन्ही पक्षांनी परस्पर सन्मान आणि विश्वास ठेवावा, असे आवाहन करण्यात आले.

नूतन लेख