Bangladesh Violence : युवा नेता उस्मान हादी याच्या मृत्यूनंतर बांगलादेशात प्रचंड हिंसाचार !

ढाका (बांगलादेश)- बांगलादेशात पुन्हा प्रचंड हिंसाचार चालू झाला आहे.  ‘इन्कलाब मंच’चा युवा नेता, तसेच कट्टर भारतविरोधी शरीफ उस्मान हादी हा १२ डिसेंबर या दिवशी झालेल्या गोळीबारात घायाळ झाला होता. त्याच्यावर सिंगापूर येथे उपचार चालू असतांना १८ डिसेंबरला त्याचा मृत्यू झाल्यानंतर रात्रीपासूनच बांगलादेशाची राजधानी येथे हिंसाचार चालू झाला. हादी याचे समर्थक रस्त्यावर उतरून आंदोलन करू लागले. येथे अनेक कार्यालयांवर आक्रमणे करण्यात आली. तसेच २ दैनिकांच्या कार्यालयांची जाळपोळ करण्यात आली. येथे २८ पत्रकारांना ठार मारण्याचाही प्रयत्न करण्यात आला. त्याच वेळी हिंदूंवरही आक्रमणे करण्यात आली. एका हिंदु तरुणाला जिवंत जाळण्यात आले. हादी याच्या मृत्यूनंतर बांगलादेशात १९ डिसेंबरला एक दिवसाचा राष्ट्रीय दुखवटा पाळण्यात आला. बांगलादेशाच्या माजी पंतप्रधान शेख हसीना यांच्या विरोधात झालेल्या आंदोलनात हादी सहभागी होता. हिंसाचाराच्या पार्श्वभूमीवर बांगलादेशाचे सैन्य, तसेच अर्धसैनिकदलाच्या सैनिकांना तणावग्रस्त भागांत तैनात करण्यात आले आहे.

🚨 Bangladesh on the Brink 🚨

After the death of Inquilab Manch youth leader Usman Hadi, Bangladesh is burning 🔥

📰 Offices of @ProthomAlo & @dailystarnews torched with staff locked inside

🎙️ A journalist killed
A Hindu youth burnt alive

As Bangladesh turns into a second… pic.twitter.com/IazTzxBXS6

— Sanatan Prabhat (@SanatanPrabhat) December 19, 2025

१८ डिसेंबरला रात्री ‘इन्कलाब मंच’ने ढाकामधील शाहाबाग परिसरात एकत्र येण्याचे आवाहन हादी याच्या समर्थकांना केले होते. हादी हा बांगलादेशातील विद्यार्थी नेता म्हणून उदयास आला होता. ढाका विद्यापिठातील ‘जातीया छात्र शक्ती’ या विद्यार्थी संघटनेने शोकयात्रा काढून हादी याच्या हत्येचा निषेध केला आहे. हादी याच्या मारेकर्‍यांना शिक्षा देण्याची मागणी आंदोलकांनी केली. या आंदोलनाच्या वेळी या संघटनेच्या कार्यकर्त्यांनी बांगलादेशाच्या गृह खात्याचे सल्लागार जहांगीर आलम चौधरी यांच्या घराला आग लावली.

युनूस यांच्याकडून कायदा हातात न घेण्याचे आंदोलकांना आवाहन

उस्मान हादी याच्या मृत्यूनंतर बांगलादेश अंतरिम सरकारचे प्रमुख महंमद युनूस यांनी शोक व्यक्त केला आहे. तसेच ‘आंदोलकांनी कायदा हातात घेऊ नये, हादी यांच्या मारेकर्‍यांना कठोर शिक्षा केली जाईल’, असे आश्वासन त्यांनी दिले आहे.

‘प्रोथोम अलो’ आणि ‘डेली स्टार’ दैनिकांच्या कार्यालयांना लावली आग !

बांगलादेशातील सर्वाधिक खप असलेल्या वृत्तपत्रांपैकी एक ‘प्रोथोम अलो’ आणि ‘डेली स्टार’ या वृत्तपत्रांच्या कार्यालयांना आग लावण्यात आली. त्या वेळी अनेक पत्रकार आणि नागरिक इमारतीत अडकले होते. आंदोलकांनी आधी इमारतीला घेराव घातला आणि नंतर आग लावली. पोलिसांनी इमारतीत अडकलेल्या पत्रकारांना अथक प्रयत्नानंतर बाहेर काढले. या कार्यालयाची जाळपोळ करण्यापूर्वी लूटमारही करण्यात आली. तसेच अन्य प्रमुख इमारतींनाही आग लावण्यात आली.

आगीत अडकलेल्या ‘डेली स्टार’च्या पत्रकार जैमा इस्लाम यांनी ‘फेसबुक’वर याचा अनुभव सांगतांना म्हटले होते की, मला आता श्वास घेता येत नाही. येथे पुष्कळ धूर आहे. मी आत आहे.’

या आक्रमणामुळे १९ डिसेंबरला दोन्ही वृत्तपत्रे प्रकाशित होऊ शकली नाहीत. तसेच त्यांची ऑनलाईन सेवाही जवळजवळ विस्कळीत झाली होती.

‘न्यू एज’च्या संपादकांवर आक्रमण

ढाका येथील ‘न्यू एज’चे संपादक नुरुल कबीर यांच्यावर काही लोकांनी आक्रमण केले. रात्री तोडफोड आणि जाळपोळ करत आंदोलक कबीर यांच्या कार्यालयात पोचले आणि त्यांच्यावर आक्रमण केले.

मुजीबूर रहमान यांच्या निवासस्थानाची तोडफोड

हिंसक आंदोलकांनी माजी राष्ट्रपती शेख मुजीबुर रहमान यांच्या निवासस्थानाचीही तोडफोड केली. शेख हसीना यांच्या अवामी लीग पक्षाच्या कार्यालयांनाही आग लावण्यात आली. हादी याच्या मृत्यूनंतर त्याच्या समर्थकांनी ढाका विद्यापिठातील शेख मुजीबुर रहमान सभागृहाचे नाव ‘शहीद उस्मान हादी हॉल’ असे ठेवले आहे आणि या नावाचे फलक लावले आहेत.

पत्रकाराची गोळीबारात हत्या

बांगलादेशातील खुलना येथे पत्रकार इम्दादुल हक मिलन यांची गोळ्या घालून हत्या करण्यात आली. या घटनेत आणखी एक जण घायाळ झाला असून त्याला रुग्णालयात भरती करण्यात आले आहे, असे पोलिसांनी सांगितले. मिलन हे शालुआ प्रेस क्लबचे अध्यक्ष होते. गोळीबाराच्या वेळी मिलन शालुआ बाजारातील एका चहाच्या टपरीवर बसून चहा पीत होते. त्याच क्षणी २ मोटारसायकलवरून ४ जण अचानक आले, त्यांनी गोळीबार केला आणि तेथून पळून गेले.

भारताकडून बांगलादेशातील भारतियांना सूचना प्रसारित

बांगलादेशातील भारतीय उच्चायुक्तालयाने १९ डिसेंबरला सकाळी एक सूचना प्रसारित करून बांगलादेशात रहाणार्‍या भारतीय समुदायाच्या सदस्यांना आणि भारतीय विद्यार्थ्यांना प्रवास टाळण्याचे आवाहन केले आहे.