भारतीय संस्कृती आणि इतिहास यांच्याविषयीची अचूक माहिती ‘स्ट्रिंग रिव्हील्स’च्या माध्यमातून पोचवणारे बेंगळुरू (कर्नाटक) येथील विनोद कुमार !

विशेष सदर

छत्रपती शिवाजी महाराज यांच्या हिंदवी स्वराज्यासाठी मावळे आणि शिलेदार यांनी केलेला त्याग सर्वोच्च आहे, त्याप्रमाणे आजही अनेक हिंदुत्वनिष्ठ आणि राष्ट्रप्रेमी नागरिक धर्म-राष्ट्र यांच्या रक्षणासाठी ‘शिलेदार’ म्हणून कार्य करत आहेत. त्यांची आणि त्यांच्या हिंदु धर्मरक्षणाच्या संघर्षाची माहिती करून देणार्‍या ‘हिंदुत्वाचे शिलेदार’ या सदराद्वारे इतरांनाही प्रेरणा मिळेल. या उदाहरणांतून आपल्या मनातील चिंता दूर होऊन उत्साह निर्माण होईल ! – संपादक

‘स्ट्रिंग रिव्हील्स’ने हिंदु आणि राष्ट्र हित यांसाठी केलेले कार्य !

‘यू ट्यूब’वर १४ लाखांहूनही अधिक अनुयायी (फॉलोअर्स) असणार्‍या ‘स्ट्रिंग रिव्हील्स’ने आतापर्यंत साधारण २५० अत्यंत अभ्यासपूर्ण व्हिडिओ बनवले आहेत. यांपैकी काही व्हिडिओजना कोट्यवधी दर्शकसंख्या लाभली आहे. ‘स्ट्रिंग रिव्हील्स’ भारत, तसेच हिंदु धर्म यांच्या विरोधात कार्य करणार्‍यांचा भांडाफोड करण्यासाठी प्रसिद्ध आहे.

चॅनेलच्या नावानुसार ते कोणत्याही घटनेमागील षड्यंत्राचा ‘धागा उलगडून’ व्हिडिओच्या माध्यमातून जगासमोर ठेवते. भारतात घडणार्‍या महत्त्वाच्या घटनांमागे भारतविरोधी शक्ती कशा प्रकारे कार्यरत आहेत ?, या संदर्भातील संपूर्ण वस्तूनिष्ठ माहिती दिली जाते. यामध्ये २ वर्षांपूर्वी झालेल्या देहलीतील कथित शेतकरी आंदोलन असो अथवा कर्नाटकातील हिजाबविरोधी आंदोलन असो किंवा मणीपूर आणि नूंह (हरियाणा) येथील हिंसाचार असो, या सर्व घटनांमागील आंतरराष्ट्रीय राजकारण, धर्मनिरेपक्षतावादी शक्तींचा सहभाग, हिंदूंवरील आरिष्ट आदी गोष्टी प्रखर आणि स्पष्टपणे मांडल्या गेल्या आहेत. ईश्वरी अधिष्ठान घेऊन कार्य करण्याच्या सूत्रावरही या चॅनेलच्या माध्यमातून वेळोवेळी दिशादर्शन केले जाते.

‘स्ट्रिंग रिव्हील्स’वर यू ट्यूबने लादली बंदी !

हिंदु आणि भारत विरोधी शक्तींच्या षड्यंत्रांचा सोदाहरण भांडाफोड करण्यासाठी प्रसिद्ध असलेल्या ‘स्ट्रिंग रिव्हील्स’ या यू ट्यूब चॅनेलवर यू ट्यूबने बंदी लादली आहे. यामागे कारण देतांना यू ट्यूबने सांगितले, ‘या चॅनलने त्यांच्या नियमांचे गंभीररित्या उल्लंघन केले आहे.’ यू ट्यूबने आतापर्यंत कधीच अशा प्रकारे त्यांना एखाद्या आक्षेपार्ह व्हिडिओच्या विरोधात चेतावणी दिली नाही; थेट त्यांच्यावर प्रतिबंध लादण्याची अन्याय्य कारवाई केली. याविषयी ‘स्ट्रिंग रिव्हील्स’ने म्हटले आहे, ‘यू ट्यूबने कुणाचे मन राखण्यासाठी ही कारवाई केली. आम्ही तुमच्या विरोधात पुष्कळ दूरपर्यंत जाऊन लढू शकतो, हे तुम्ही विसरू नका, तसेच अभिव्यक्तीस्वातंत्र्यासाठी केवळ यू ट्यूब हे एकच माध्यम नाही, हेसुद्धा ध्यानात असू द्या !’

‘बीबीसी’चा हिंदुद्वेष उघड करण्यासाठी ‘ग्लोबल हिंदु फेडरेशन’ आणि ‘स्ट्रिंग रिव्हील्स’ यांच्याकडून लघुचित्रपट प्रसारित !

‘बीबीसी’, म्हणजेच ‘ब्रिटीश ब्रॉडकास्टिंग कॉर्पोरेशन’ ही वृत्तवाहिनी हिंदुद्वेषाने पछाडलेली असून भारत आणि हिंदू यांच्याविषयी खोटी कथानके प्रसृत करण्यासाठी ती कुप्रसिद्ध आहे.

अशा बीबीसीच्या विरोधात प्रथमच एक अत्यंत अभ्यासपूर्ण अशी ‘डॉक्युमेंट्री’ (लघुचित्रपट) २५ ऑक्टोबर २०२४ या दिवशी प्रसारित करण्यात आली. ही डॉक्युमेंट्री ‘ग्लोबल हिंदु फेडरेशन’ आणि ‘स्ट्रिंग रिव्हील्स’ या हिंदुत्वनिष्ठ संघटनांनी संयुक्त विद्यमाने बनवलेली आहे.