गोमांसाची अवैधरित्या वाहतूक करणारा सरफराज ख्वाजा याला अटक

सावंतवाडी – महाराष्ट्रामध्ये गोवंश हत्या बंदी असतांनाही गोमांसाची अवैधरित्या वाहतूक करणारा आणि गेल्या काही दिवसांपासून पसार असलेला संशयित आरोपी सरफराज भाऊद्दीन ख्वाजा (रहाणार बाहेरचा वाडा, सावंतवाडी) याला पोलिसांनी २६ जून या दिवशी सापळा रचून अटक केली. सरफराज बाहेरचा वाडा येथे आल्याची गोपनीय माहिती मिळाल्यानंतर सावंतवाडी आणि वेंगुर्ला पोलिसांच्या पथकाने संयुक्तपणे कारवाई करून त्याला अटक केली.

१५ मे या दिवशी सायंकाळी ६ वाजण्याच्या सुमारास संशयित आरोपी सरफराज सावंतवाडी येथून आजगाव येथे दुचाकीवरून २५ किलो वजनाचे गोमांस विक्रीसाठी घेऊन जात होता. धाकोरे येथे आल्यावर तेथील ग्रामस्थांना सरफराजविषयी संशय आल्याने त्याचा पाठलाग केला. ग्रामस्थ पाठलाग करत असल्याचे लक्षात आल्यावर सरफराज याने २५ किलो गोमांस तेथील एका काजूच्या बागेत फेकून दिले आणि दुचाकीसह तो पसार झाला. याविषयी पोलिसांनी घटनास्थळी येऊन माहिती घेतली आणि सरफराजच्या विरोधात विविध कलमांच्या अंतर्गत गुन्हा नोंद केला होता.