Bengaluru Girl Molested : बेंगळुरूमध्ये भररस्त्यात एका तरुणाने मुलीची काढली छेड !

बेंगळुरूमध्ये तरुणाने मुलीची काढली छेड (डावीकडे) कर्नाटकचे गृहमंत्री जी परमेश्वर (उजवीकडे)

बेंगळुरू (कर्नाटक) – बेंगळुरू शहरातील बीटीएम् लेआउटमधील सुद्दागुंटेपल्या येथे भररस्त्यात एका तरुणाने एका मुलीशी अतिप्रसंग करण्याचा प्रयत्न केला. ही घटना ‘सीसीटीव्ही कॅमेर्‍या’त चित्रित झाली आहे. या अतिप्रसंगानंतर आरोपी तरुणाने घटनास्थळावरून पळ काढला. कर्नाटक पोलिसांनी आरोपीच्या विरोधात गुन्हा नोंदवून या प्रकरणाचे अन्वेषण चालू केले आहे. राज्यात महिलांवरील अत्याचारांत वाढ झाल्याने नागरिकांनी संताप व्यक्त केला आहे. (हे पोलीस आणि प्रशासन यांना लज्जास्पद ! – संपादक)

संपादकीय भूमिका

कर्नाटकमध्ये काँग्रेसचे सरकार आल्यापासून गुन्हेगारांना चेव चढला आहे, असे गेल्या काही कालावधीतील घटनांवरून दिसून येते. त्यामुळे ‘हे सर्वसामान्य जनतेचे नव्हे, तर गुन्हेगारांचे सरकार आहे’, असे कुणाला वाटल्यास चुकीचे काय ? असे सरकार खाली खेचण्याचा अधिकारही लोकशाहीचा राजा असणार्‍या जनतेला असला पाहिजे !

मुलींनीही आता सरकार आणि पोलीस आपले रक्षण करतील, या भ्रमात न रहाता स्वतःचे रक्षण स्वतः करण्यासाठी स्वसंरक्षण प्रशिक्षण घेतले पाहिजे !

(म्हणे) ‘मोठ्या शहरांत अशा घटना घडणारच !’ – गृहमंत्री जी परमेश्वर

मोठ्या शहरांत अशा घटना घडणारच, अशी असंवेदनशील प्रतिक्रिया कर्नाटकचे गृहमंत्री जी परमेश्वर यांनी या घटनेवर व्यक्त केली. याविषयी जी काही कायदेशीर कारवाई करायची असेल, ती कायद्यानुसार केली जाईल, असेही त्यांनी सांगितले. बेंगळुरूतील एक व्हिडिओ प्रसारित झाल्यानंतर जी परमेश्वर यांनी ही प्रतिक्रिया दिली, असे ‘इंडिया टुडे’ने प्रसिद्ध केलेल्या वृत्तात म्हटले आहे.