सद्गुरु डॉ. मुकुल गाडगीळ यांनी सांगितलेले नामजपादी उपाय करून तीव्र आध्यात्मिक त्रासावर मात करणार्‍या कु. मधुरा चतुर्भुज !

‘वर्ष २०१६ पासून मी आणि माझी आई रामनाथी (गोवा) येथील सनातनच्या आश्रमात सेवा करत आहोत. आरंभी मला वाईट शक्तींच्या त्रासांच्या निवारणार्थ सद्गुरु डॉ. मुकुल गाडगीळ यांनी ८ ते १० घंटे नामजपादी उपाय करायला सांगितले होते. देवाच्या कृपेने ते माझ्याकडून भावपूर्ण झाले आणि मला विविध अनुभूतीही आल्या. नामजपादी उपाय भावपूर्ण आणि परिणामकारक केल्यावर माझ्यामध्ये झालेले पालट येथे दिले आहेत.

१. नामजपादी उपाय केल्यानंतर मनाचा संघर्ष उणावणे आणि आश्रमात रहाणे जमू लागणे

आरंभी मी घरून आश्रमात आल्यावर माझ्या मनात घरी जाण्याचे विचार पुष्कळ असायचे. तेव्हा मला आश्रमातील चैतन्य सहन होत नव्हते आणि मला आश्रमात रहाण्यासाठी पुष्कळ संघर्ष करावा लागत होता. नामजपादी उपाय केल्यानंतर मला आश्रमात रहाणे जमू लागले.

२. नामजपादी उपाय नियमित केल्यामुळे आध्यात्मिक त्रासांशी लढता येणे आणि रागावर नियंत्रण ठेवता येणे

माझ्या मनात पुष्कळ दिवस नकारात्मक विचार असायचे. माझ्यामध्ये ‘चिडचिड करणे, राग येणे, प्रतिक्रिया येणे’, असे स्वभावदोष होते. त्यामुळे माझे रागावर नियंत्रण रहात नव्हते. मी आईवर चिडचिड करायचे. तिला त्याचा पुष्कळ त्रास व्हायचा. नामजपादी उपाय केल्यामुळे मी स्वावलंबी झाले. आई घरी आल्यावर मी तिच्याशी प्रेमाने बोलायचे. त्यामुळे आम्ही दोघी आनंदात राहू लागलो.

माझी आई अध्यात्मप्रसार करण्यासाठी जायची. तेव्हा मी नामजप करत घरातील कामे करायची. नामजपादी उपाय नियमित केल्यामुळे मी आध्यात्मिक त्रासांशी लढू लागले.

३. सद्गुरु डॉ. मुकुल गाडगीळ यांनी सांगितलेले नामजपादी उपाय केल्यामुळे आध्यात्मिक त्रास न्यून होणे

सद्गुरु गाडगीळकाका यांनी तीव्र आध्यात्मिक त्रासांसाठी मला नामजपादी उपाय करण्यास सांगितले. ते उपाय देवाने माझ्याकडून करून घेतले. उपाय करण्यासाठी देवानेच मला शक्ती दिली. आता माझा आध्यात्मिक त्रास पुष्कळ न्यून झाला आहे. त्याबद्दल मी कृतज्ञता व्यक्त करते.’

– कु. मधुरा मोहन चतुर्भुज, सनातन आश्रम, रामनाथी, गोवा. (२८.७.२०२४)