Maharashtra ‘Tipu Sultan Party’ Got Votes : महाराष्ट्रात लोकसभा निवडणूक लढवून ‘टिपू सुलतान’ पक्षाने मिळवली शेकडो मते !

मुंबई, १४ जून (वार्ता.) – क्रूरकर्मा टिपू सुलतानाच्या नावाने कार्यरत असलेल्या ‘टिपू सुलतान पार्टी’ने महाराष्ट्रात लोकसभेची निवडणूक लढवून ९७८ मते मिळवल्याचे निवडणुकीच्या निकालातून उघड झाले आहे. लोकसभा निवडणुकीच्या माध्यमातून या पक्षाने महाराष्ट्रात शिरकाव करण्याचा प्रयत्न केला आहे. ‘टिपू सुलतान पार्टी’ हा भारतीय निवडणूक आयोगाकडे नोंदणी असलेला पक्ष आहे.

जावेद सलीद सय्यद यांनी ‘टिपू सुलतान पार्टी’च्या माध्यमातून ही निवडणूक लढवली. जून २०१९ पासून हा पक्ष कार्यरत आहे. प्रा. शेख सादेक हे या पक्षाचे राष्ट्रीय अध्यक्ष आहेत. भारताला महासत्ता बनवणे, देशाला मद्यमुक्त करणे, देशातून जातीयवाद हद्दपार करणे आदी उद्दिष्टे दाखवून या पक्षाचे कार्य विविध सामाजिक उपक्रमांतून महाराष्ट्रात चालू आहे. अल्पसंख्यांक आणि दलित समाज यांच्या हितासाठी कार्यरत असल्याचे या पक्षाकडून घोषित करण्यात आले आहे.

नागरिकत्व सुधारणा कायदा (सीएए) आणि राष्ट्रीय नागरिकता नोंदणी (एन्.आर्.सी.) या कायद्यांना विरोध !

नागरिकत्व सुधारणा कायदा (सीएए) आणि राष्ट्रीय नागरिकता नोंदणी (एन्.आर्.सी.) यांना या पक्षाकडून मोठ्या प्रमाणात विरोध करण्यात आला. महाराष्ट्रातही या पक्षाचे कार्य काही प्रमाणात आहे. बीड जिल्ह्यात टिपू सुलतान ब्रिगेड ही संघटना मोठ्या प्रमाणात कार्यरत असल्यामुळे लोकसभा निवडणुकीत बीडमध्ये या पक्षाचा उमेदवार उभा करण्यात आला होता. एक ‘आदर्श बादशहा’ म्हणून या पक्षाकडून टिपू सुलतानाचे उदात्तीकरण केले जात आहे.