साधनेद्वारे व्यसनाधीनतेवर अल्पावधीत मात करता येते ! – शॉन क्लार्क, फोंडा, गोवा

महर्षि अध्यात्म विश्वविद्यालया’च्या वतीने आयर्लंडमध्ये ‘व्यसनाधीनता’ या विषयावर ‘ऑनलाईन’ शोधनिबंध सादर !

‘महर्षि अध्यात्म विश्वविद्यालया’चे संस्थापक सच्चिदानंद परब्रह्म डॉ. जयंत आठवले हे शोधनिबंधाचे लेखक, तर श्री. शॉन क्लार्क आहेत सहलेखक !

फोंडा (गोवा) – आध्यात्मिक संशोधनातून असे दिसून आले आहे की, एखाद्या व्यसनांची ३० टक्के कारणे शारीरिक असतात, म्हणजे व्यसनाधीन पदार्थांवर अवलंबून, तर ३० टक्के मानसिक आणि ४० टक्के ही आध्यात्मिक असतात. अध्यात्मशास्त्रानुसार योग्य आध्यात्मिक साधना केल्यास व्यसनावर अल्पावधीत मात करता येते. तसेच व्यसनांवर पूर्णपणे मात करण्याचे ‘आध्यात्मिक साधना’ हे एक अतिशय शक्तीशाली साधन आहे, असे ‘महर्षि अध्यात्म विश्वविद्यालया’च्या संशोधन गटाचे सदस्य आणि ६५ टक्के आध्यात्मिक पातळी असलेले श्री. शॉन क्लार्क यांनी सांगितले. डब्लिन, आयर्लंड येथे ‘कॉन्फरन्स सिरीज’ यांनी आयोजित केलेल्या १० व्या ‘ॲन्युअल काँग्रेस ऑन मेंटल हेल्थ’ (ए.सी.एम्.एच्. २०२३) या ‘ऑनलाईन’ आंतरराष्ट्रीय वैज्ञानिक परिषदेत ते बोलत होते. श्री. क्लार्क यांनी ‘महर्षि अध्यात्म विश्वविद्यालया’च्या वतीने ‘आध्यात्मिक कारणांमुळे व्यसने कशी जडतात ? आणि त्यावर मात कशी करावी ?’, या विषयावर १०२ वा शोधनिबंध सादर केला. महर्षि अध्यात्म विश्वविद्यालयाचे संस्थापक सच्चिदानंद परब्रह्म डॉ. आठवले हे या शोधनिबंधाचे लेखक, तर श्री. शॉन क्लार्क हे सहलेखक आहेत.

१. श्री. शॉन क्लार्क म्हणाले की, नकारात्मक शक्तींचा प्रभाव किंवा अतृप्त पूर्वजांमुळे होणारे त्रास हे व्यक्तीच्या जीवनावर परिणाम करतात, तसेच ते त्याच्या नकारात्मक ऊर्जेची प्रभावळ वाढवण्यात कारणीभूत ठरतात. तथापि एखाद्या व्यक्तीने आध्यात्मिक साधना चालू केली की, त्याची नकारात्मक ऊर्जेची प्रभावळ न्यून होऊ लागते.

२. श्री. क्लार्क यांनी या परिषदेत महर्षि अध्यात्म विश्वविद्यालयाने ‘युनिव्हर्सल ऑरा स्कॅनर’ (यू.ए.एस्.) या उपकरणांद्वारे प्रयोग करून काढलेले निष्कर्ष सादर केले.

३. या प्रयोगांमध्ये फ्रान्समधील एका संतांच्या ३ चित्रांची प्रभावळ मोजण्यात आली. पहिले चित्र हे साधना चालू करण्यापूर्वी जेव्हा त्यांना सिगारेटचे व्यसन होते. दुसरे चित्र म्हणजे आध्यात्मिक साधना चालू केल्यानंतर आणि तिसरे हे आध्यात्मिक प्रगती करून संत झाल्यानंतरचे होते.

४. यातील निष्कर्षांवरून असे आढळून आले की, ज्या पहिल्या चित्रात त्यांना सिगारेटचे व्यसन होते, त्यात नकारात्मक ऊर्जेची प्रभावळ मोठ्या प्रमाणात आढळली. दुसर्‍या चित्रात त्यांची नकारात्मक ऊर्जेची प्रभावळ अर्ध्याने अल्प झाली, तर संत झाल्यानंतर काढलेल्या त्यांच्या तिसर्‍या चित्रात सकारात्मक ऊर्जेची प्रभावळ मोठ्या प्रमाणात आढळून आली.

५. या वेळी महर्षि अध्यात्म विश्वविद्यालयामध्ये आध्यात्मिक साधना करून काही मास किंवा वर्षांमध्ये व्यसनांवर मात केलेल्या साधकांच्या चाचणीची उदाहरणे देण्यात आली.