‘ऑनलाईन’ हिंदु राष्ट्र-जागृती सभेच्या निमित्ताने प्रसार करतांना सिंधुदुर्ग जिल्ह्यातील हिंदु जनजागृती समितीच्या कार्यकर्त्यांना जाणवलेली सूत्रे आणि आलेल्या अनुभूती

१. श्री. आनंद नाईक, कुडाळ

१ अ. ‘साक्षात् श्रीकृष्णच हात धरून प्रसार करून घेत आहे’, असे जाणवून आनंद होणे : ‘श्रीकृष्णाच्या कृपेने ६.२.२०२१ या दिवशी झालेल्या ‘ऑनलाईन’ हिंदु राष्ट्र-जागृती सभेच्या प्रसारसेवेतून मला पुष्कळ चैतन्य अनुभवता आले. प्रसाराची सेवा करत असतांना जिज्ञासूंमधील उत्साह आणि आनंद अनुभवता आला. या सेवेमुळे ‘साक्षात् श्रीकृष्णच माझा हात धरून माझ्याकडून प्रसार करून घेत आहे’, असा भाव अनुभवायला मिळून आनंद मिळाला.’

२. कु. पूजा धुरी, कुडाळ

२ अ. प्रथमच भेटणार्‍या धर्मप्रेमी व्यक्तीने आपुलकीने बोलल्यावर भावजागृती होणे : ‘गावामध्ये प्रसार करतांना आम्ही एका धर्मप्रेमींच्या घरी गेलो होतो. त्यांनी आमचे आदराने स्वागत केले. सभेचा विषय ऐकल्यानंतर ते म्हणाले, ‘‘मी माझ्या संपर्कातील सर्वांना याविषयी सांगतो.’’ आमचे बोलणे चालू असतांना ते मला म्हणाले, ‘‘ताई, तू कधीही आमच्या घरी येऊ शकतेस. हे तुझेच घर आहे.’’ त्यांच्या या बोलण्याने माझी पुष्कळ भावजागृती झाली.

२ आ. ‘हिंदु जनजागृती समिती’विषयी समाजमनात असलेला आदर ! : एका धर्मप्रेमी महिलेला सभेचे निमंत्रण दिल्यावर त्या म्हणाल्या, ‘‘तुमच्यासारख्यांचे पाय आमच्या घराला लागणे’, हे आमचे भाग्यच आहे. आम्हाला तुमच्या मार्गदर्शनाची आवश्यकता आहे.’’ यातून समाजात ‘हिंदु जनजागृती समिती’विषयी पुष्कळ आदरभाव आहे’, हे माझ्या लक्षात आले.’

३. श्री. मिलिंद पारकर, कणकवली

३ अ. स्थानिक ‘केबल’ वाहिनीचालकांनी सभेच्या थेट प्रक्षेपणासाठी आरंभी ‘विशिष्ट शुल्क भरावे लागेल’, असे सांगणे आणि सभा चालू होण्यापूर्वी अर्धा घंटा त्यांनी ‘सभेचे थेट प्रक्षेपण विनामूल्य करत आहोत’, असा निरोप देणे : ‘स्थानिक ‘केबल’ वाहिनीवर हिंदु राष्ट्र-जागृती सभेला प्रसिद्धी मिळावी’, यासाठी आमचे प्रयत्न चालू होते. आम्ही एका स्थानिक वृत्तवाहिनीच्या प्रतिनिधीला संपर्क केला होता. त्याने ‘प्रक्षेपणासाठी शुल्क भरावे लागेल’, असे आम्हाला सांगितले होते. संपूर्ण जिल्ह्यात या वाहिनीच्या सुमारे ६० सहस्र जोडण्या आहेत. ग्रामीण भागात भ्रमणभाषचे ‘नेटवर्क’ नसलेल्या ठिकाणी ‘केबल’च्या माध्यमातून प्रक्षेपण झाल्यास अनेक धर्मप्रेमींना सभा पहाता येणार होती. सभा चालू होण्यापूर्वी अर्धा घंटा मी त्या प्रतिनिधीला पुन्हा संपर्क करून विचारले. तेव्हा त्यांनी ‘‘आम्ही तुमच्या सभेचे थेट प्रक्षेपण विनामूल्य करत आहोत’’, असे सांगितले. सभेच्या प्रसारणाला मिळालेली ही प्रसिद्धी, म्हणजे श्रीकृष्णाच्या कृपेची मोठी अनुभूतीच होती.’

४. श्री. वासुदेव सडवेलकर, कुडाळ

४ अ. सभेपूर्वी डोळे बंद केल्यावर श्रीकृष्णाचे दर्शन होणे : ‘ही सभा चैतन्यमय वाटत होती. सभा चालू होतांना मी थोडा वेळ डोळे मिटले. त्या वेळी मला श्रीकृष्णाचे दर्शन झाले. सभेच्या शेवटी उभे राहून शपथ घेतांना माझ्या संपूर्ण शरिरावर रोमांच उभे राहिले.’

(सर्व सूत्रांचा दिनांक ६.३.२०२१)