पाकिस्तान पाकव्याप्त काश्मीरमधील गिलगिट-बाल्टिस्तान चीनला देण्याच्या सिद्धतेत !

कर्ज फेडण्यासाठी कंगाल पाक घेऊ शकतो निर्णय

इस्लामाबाद (पाकिस्तान) – देशावरील वाढते कर्ज फेडण्यासाठी पाकिस्तान पाकव्याप्त काश्मीरमधील गिलगिट-बाल्टिस्तान हा भाग चीनला भाडेपट्ट्यावर देण्याची शक्यता आहे, असे ‘काराकोरम नॅशनल मूव्हमेंट’चे अध्यक्ष मुमताज यांनी सांगितले.

Fears in Gilgit Baltistan that Pak may cede region to China on lease to pay off debts https://t.co/0J02Tg6eD0

— TOI World News (@TOIWorld) June 23, 2022

ते पुढे म्हणाले की, गिलगिट-बाल्टिस्तान प्रदेश भविष्यात युद्धाचे मैदान बनू शकतो. जर पाकिस्तानने चीनला गिलगिट-बाल्टिस्तान दिले, तर चीनकडून पाकला अधिक मोठे साहाय्य मिळू शकते; मात्र हे पाऊल पाकला महागात पडू शकते; कारण चीनचा प्रभाव वाढेल, अशी कोणतीही गोष्ट अमेरिका होऊ देणार नाही. अमेरिका भविष्यात जागतिक बँक, जागतिक नाणेनिधी आणि अन्य जागतिक संघटना यांच्याद्वारे पाकला काळ्या सूचीमध्ये टाकू शकतो.

गिलगिट-बाल्टिस्तानची स्थिती दयनीय  

पाकिस्तानी प्रसारमाध्यमांच्या वृत्तांनुसार गिलगिट-बाल्टिस्तानच्या लोकसंख्येत घट होत आहे. सक्षम लोक तेथून पलायन करत आहेत. संपूर्ण पाकिस्तानात जितक्या आत्महत्या होतात, त्यांपैकी ९ टक्के आत्महत्या गिलगिट-बाल्टिस्तानमध्ये होत आहेत. येथे केवळ २ घंटेच वीज उपलब्ध असते. यासह अन्य सुविधांचाही येथे अभाव आहे.