एस्.एस्.आर्.एफ.चे सद्गुरु सिरियाक वाले यांच्या समवेत ‘ऑनलाईन’ सामूहिक नामजप करतांना आलेल्या वैशिष्ट्यपूर्ण अनुभूती !

१.१२.२०२० या दिवशी झालेल्या ‘ऑनलाईन’ सामूहिक नामजपाच्या सत्संगाला मी उपस्थित होतो. मला सद्गुरु सिरियाक वाले यांच्या समवेत नामजप करण्याची संधी मिळाली. त्या वेळी मला आलेल्या अनुभूती पुढे दिल्या आहेत.

१. नामजपाला आरंभ केल्यावर न्यास करून नामजप करतांना ज्याप्रमाणे शक्ती जाणवते, त्याप्रमाणे मला माझ्या आज्ञाचक्राच्या ठिकाणी शक्ती जाणवली.

२. ‘परात्पर गुरु डॉ. आठवले किंवा सद्गुरु सिरियाक वाले माझ्यासाठी न्यास करत आहेत’, असे मला अधूनमधून जाणवत होते.

३. त्यानंतर ‘श्री दत्तगुरु माझ्यासमोर उभे आहेत’, असे मला सूक्ष्मातून दिसले. मी त्यांच्या चरणी फुले वाहिली. त्या वेळी माझा भाव जागृत झाल्याने जवळजवळ १५ – २० मिनिटे माझ्या डोळ्यांतून भावाश्रू वहात होते.

४. माझा नामजप आर्ततेने होत होता. ‘बाळ जसे स्वत:च्या आईला वात्सल्यभावाने हाक मारते, तसे ‘हे देवा, मला तुझ्याजवळ यायचे आहे’, या आर्तभावाने मी नामजप करत आहे’, असे मला जाणवत होते.

५. माझा नामजप भावपूर्ण होत असतांना मधेच मला माझ्या स्थूलदेहाचे अस्तित्व जाणवत नव्हते.

६. माझे डोळे बंद होते. मला माझ्या डोळ्यांसमोर पांढरा प्रकाश दिसत होता. त्या वेळी मला शांत वाटत होते.

७. त्यानंतर मला सूक्ष्मातून दिसले, ‘मी श्री दत्तगुरूंच्या समवेत अग्नीसमोर बसलो आहे आणि त्यांनी मला माझे स्वभावदोषांनी भरलेले गाठोडे त्या अग्नीत टाकायला सांगितले.’

८. हे सर्व अनुभवत असतांना माझा नामजप अखंड होत होता आणि ‘माझ्यावर श्री दत्तगुरूंच्या आशीर्वादाचा वर्षाव होत आहे’, असे मला जाणवत होते.

९. पूर्वी श्री दत्तगुरूंचे चित्र डोळ्यांसमोर ठेवल्याविना मला नामजप करता येत नव्हता. आतापर्यंत मी कधीही डोळे मिटून नामजप करू शकत नव्हतो. या वेळी मात्र मला ५० मिनिटांपर्यंत डोळे मिटून नामजप करता आला, तसेच या पूर्वीही माझ्या डोळ्यांत भावाश्रू येत होते; परंतु ती भावावस्था केवळ २ – ३ मिनिटेच टिकून रहायची; मात्र या वेळी माझी भावावस्था अधिक वेळ टिकून होती.

श्री दत्तगुरु आणि प.पू. डॉ. आठवले यांच्या कृपाशीर्वादामुळेच मला या अनुभूती आल्या. मला या अनुभूती दिल्याबद्दल मी ईश्वरचरणी कृतज्ञता व्यक्त करतो.

– श्री. रंजित काशीद, गेथर्सबर्ग, मेरीलँड, अमेरिका. (१.१२.२०२०)