पुणे नदी सुधार योजनेमध्‍ये केवळ झुडूप प्रकारातील झाडे तोडण्‍यात येणार ! – महापालिका प्रशासनाचे स्‍पष्‍टीकरण

पुणे – मुळा-मुठा नदी काठ पुनरुज्‍जीवन प्रकल्‍पाच्‍या अंतर्गत येणार्‍या नदी सुधार योजनेमध्‍ये संबंधित ठिकाणी सुबाभूळ, कुबाभूळ ही सर्व झुडूप प्रकारातील झाडे आहेत. त्‍याची अनियंत्रित वाढ होते. आवश्‍यक असतील तेथीलच ही झुडपे काढण्‍यात येणार आहेत, असे महापालिका प्रशासनाने स्‍पष्‍ट केले आहे.

पुणे मनपा अंतर्गत राबविण्यात येणाऱ्या मुळा-मुठा प्रकल्पामुळे होणाऱ्या प्रस्तावित वृक्षतोडीबाबत समाज माध्यमातून चुकीची माहिती प्रसिद्ध होत आहे. यासंदर्भात पुणे मनपाचे अधिक्षक अभियंता युवराज देशमुख यांनी संक्षिप्त माहिती देऊन वृक्षतोडीबाबत असणाऱ्या सर्व शंकांचे निरसन केले.#PMC pic.twitter.com/pQtPGmplLo

— PMC Care (@PMCPune) April 30, 2023

त्‍या संदर्भातील एक चलचित्र (व्‍हिडिओ) प्रसारित करण्‍यात आले आहे.

नदी सुधार प्रकल्‍पामध्‍ये ६ ते ७ सहस्र झाडे तोडण्‍यात येणार असल्‍याची चर्चा पर्यावरणप्रेमी, वृक्षप्रेमी आणि पुणेकर यांच्‍यात असल्‍याने २९ एप्रिल या दिवशी ‘चिपको’ आंदोलन करण्‍यात आले होते. या पार्श्‍वभूमीवर महापालिकेने वरील सूत्र स्‍पष्‍ट केले आहे.

महापालिकेचे अधिक्षक अभियंता युवराज देशमुख म्‍हणाले, ‘‘या प्रकल्‍पामधील ६ ते ७ सहस्र झाडे तोडण्‍यात येणार यामध्‍ये काहीही तथ्‍य नाही. केवळ १० किलोमीटर नदीकाठ विकसित केला जाणार आहे. त्‍याकरिता सर्वेक्षण केलेली ३ सहस्र झाडे त्‍यातील बहुतांश झुडूप प्रकारातील वृक्षांची तोड केली जाणार आहे. स्‍थानिक प्रजातीची कोणतीही झाडे काढली जाणार नाहीत.’’