गोवा : मुख्यमंत्र्यांच्या हस्ते आज विकलांगांसाठी ‘व्हीलचेअर सुलभ ई-रिक्शा’चे लोकार्पण होणार

पणजी – मुख्यमंत्री डॉ. प्रमोद सावंत यांच्या हस्ते ‘सेवा, सुशासन आणि जनकल्याण’ उपक्रमाचा भाग म्हणून पणजी येथील मिनेझिस ब्रागांझा येथे २४ एप्रिलला ‘व्हीलचेअर सुलभ ई-रिक्शा’ ही योजना कार्यान्वित करण्यात येणार आहे. राज्य दिव्यांग आयुक्त गुरुप्रसाद पावसकर यांनी ही माहिती दिली आहे.

आयुक्त गुरुप्रसाद पावसकर पुढे म्हणाले,

‘‘विकलांग व्यक्तीचा प्रवास सुलभ करण्यासाठी आयोगाच्या वतीने ‘व्हीलचेअर सुलभ ई-रिक्शा’ सेवेला प्रारंभ करण्यात येत आहे. या सेवेचे व्यवस्थापन ‘व्हीलचेअर टॅक्सीसेवा’मध्ये अग्रणी असलेल्या ‘ईझी मूव्ह’ या आस्थापनाद्वारे करण्यात येत आहे.

विकलांगांना कामाचे ठिकाण, रुग्णालये, शाळा आणि इतर ठिकाणी प्रवास करण्यासाठी या सुविधेचा लाभ होणार आहे. या रिक्शाचा मागचा दरवाजा ‘रॅम्प’मध्ये रूपांतरित होत असल्याने विकलांगांना रिक्शात चढ-उतार करणे सुलभ होणार आहे.’’