साधिकेवर आध्‍यात्मिक स्‍तरावरील उपाय करण्‍यासाठीच सेवेच्‍या खोलीत सूक्ष्मातून मारक गंध आल्याचे  परात्‍पर गुरु डॉक्‍टरांनी सांगणे

एकदा मी सेवा करत असलेल्‍या ठिकाणी सूक्ष्मातून मारक गंध येत होता. त्‍या ठिकाणी सर्वांना तो गंध येत होता; पण मला असलेल्‍या तीव्र आध्‍यात्मिक त्रासामुळे मला तो गंध येत नव्‍हता. मला गंध येत नसूनही त्‍या गंधाच्‍या माध्‍यमातून माझ्‍यावर आध्यात्मिक स्तरावरील उपाय होत असल्याने माझ्या आध्यात्मिक त्रासात वाढ झाली.

काही वेळाने प.पू. डॉक्‍टर त्‍या ठिकाणी आले. प.पू. डॉक्‍टरांना त्‍या गंधामुळे माझ्‍या आध्यात्मिक त्रासात वाढ झाल्याचे समजल्यावर ते म्हणाले, ‘‘तृप्तीवर आध्यात्मिक स्तरावरील उपाय करण्यासाठीच तो मारक गंध आला आहे. तो गंध पुष्कळ तीव्र असल्याने मला श्वासही घेता येत नाही. इतरांना तो  ६० टक्‍के घेता येत आहे; पण तृप्‍तीला १० टक्‍केही घेता येत नसेल.’’ नंतर त्‍यांनी सेवेच्‍या खोलीच्‍या शेजारी असलेल्‍या त्‍यांच्‍या खोलीत जाऊन पाहिले. तिथे तारक आणि मारक दोन्ही गंध येत होते. तेव्हा ते म्हणाले, ‘‘तृप्तीचा आध्यात्मिक त्रास न्यून करण्यासाठी मारक आणि माझ्यासाठी तारक गंध येत आहे. देवाने गंधाच्या माध्यमातून रक्षण केले. चला ! देव आहे आपल्या समवेत.’’

‘मारक गंध यायला लागल्‍यापासून मला निराशा आली आहे’, असे मी प.पू. डॉक्टरांना सांगितल्यावर ते म्हणाले, ‘‘त्या मारक गंधाचा तुझा स्थूलदेह, मनोदेह, कारणदेह आणि महाकारणदेह या सर्वांवरच परिणाम होत आहे. असे असले, तरीही तुला सहन होईल, एवढाच सुगंध देव देत आहे.’’

– कु. तृप्‍ती कुलकर्णी, सनातन आश्रम, रामनाथी, गोवा. (२५.१.२०२४)