वैशाख पौर्णिमेनिमित्त पुणे येथील श्रीमंत दगडूशेठ हलवाई गणपतीला ५ सहस्र शहाळ्यांचा महानैवेद्य !

पुणे – वैशाख पौर्णिमेचे औचित्य साधून येथील श्रीमंत दगडूशेठ हलवाई गणपतीला २३ मे या दिवशी ५ सहस्र शहाळ्यांचा महानैवेद्य अर्पण करण्यात आला. ससून रुग्णालयातील रुग्णांना २४ मे या दिवशी शहाळ्यांचा प्रसाद देण्यात येणार आहे. शिव-पार्वतीच्या घरी वैशाख शुद्ध पौर्णिमेच्या शुभदिनी दुर्मती राक्षसाच्या वधार्थ झालेला अवतार हा पुष्टीपती विनायक जन्मोत्सव साजरा करण्यात येतो. वैशाख वणव्यापासून देशवासियांचे रक्षण व्हावे. दुष्काळ, पाण्याचे दुर्भिक्ष शेतकर्‍यांच्या समस्या गणरायाच्या कृपेने निर्विघ्न व्हाव्यात, या सद्भावनेने शहाळ्यांचा महानैवेद्य श्रीमंत दगडूशेठ हलवाई गणपतीला अर्पण करण्यात आला. पहाटे ब्रह्मणस्पती सूक्त अभिषेक झाला. त्यानंतर श्रीमंत दगडूशेठ हलवाई सार्वजनिक ‘गणपति ट्रस्ट’च्या वतीने मंदिरात शहाळे महोत्सव आयोजित करण्यात आला.