हणजूण (गोवा) येथील वेश्याव्यवसायाच्या प्रकरणी हवालदाराचे स्थानांतर

सुरक्षेसाठी पैसे (प्रॉटेक्शन मनी) घेतल्याचा ठपका

पणजी, ९ सप्टेंबर (वार्ता.) – हणजूण येथील पोलिसांनी उघडकीस आणलेल्या आंतरराष्ट्रीय वेश्याव्यवसायाच्या ठिकाणाला पोलिसांचे संरक्षण दिल्याचा ठपका ठेवून हवालदार अनिल पिळगावकर याचे तडकाफडकी पणजी मुख्यालयात स्थानांतर करण्यात आले आहे. हवालदार अनिल पिळगावकर याचा हणजूण पोलीस ठाण्यात दबदबा आहे. वेश्याव्यवसायावर कारवाई करतांना कह्यात घेण्यात आलेल्या संशयितांनी दिलेल्या माहितीवरून पोलिसांनी हवालदार अनिल पिळगावकर याच्यावर कारवाई केलेली आहे. हवालदार अनिल पिळगावकर हा गेली १० वर्षे हणजूण पोलीस ठाण्यात कार्यरत होता. हवालदार अनिल पिळगावकर याचे आगशी आणि कोलवाळ या पोलीस ठाण्यांमध्ये स्थानांतर करण्याचे आदेश यापूर्वी देण्यात आलेले होते; मात्र स्थानांतर झाले नाही. यामुळे ‘असे का घडले ?’ याचे सखोल अन्वेषण केल्यास मोठे पोलीस अधिकारी सापडू शकतील, अशा प्रतिक्रिया उमटत आहे.

चालू वर्षी १४ पोलिसांचे निलंबन !

यंदा जानेवारीपासून आतापर्यंत निरनिराळ्या कारणांसाठी १४ पोलीस कर्मचार्‍यांना सेवेतून निलंबित करण्यात आले आहे. निलंबित पोलिसांच्या सूचीत पोलीस शिपायांपासून पोलीस उपमहानिरीक्षक यांचा समावेश आहे. हत्यांच्या प्रकरणांतील सहभाग, लाच घेणे, वेळेत गुन्हा नोंद न करणे, वयस्कर जोडप्याची सतावणूक करणे, महिलांचा विनयभंग आदी कारणांमुळे पोलिसांवर निलंबनाची कारवाई करण्यात आली आहे. यामुळे लोकांचा पोलिसांवरील विश्वास उडत आहे.