सोलापूर बसस्‍थानकातील अस्‍वच्‍छता दूर करून नागरिकांना आवश्‍यक सुविधा त्‍वरित पुरवाव्‍यात !

सोलापूर येथे ‘सुराज्‍य अभियाना’च्‍या वतीने निवेदन सादर

विभागीय वाहतूक अधीक्षक सदाशिव कदम (उजवीकडे) यांना निवेदन देतांना राष्‍ट्रप्रेमी

सोलापूर, १८ एप्रिल (वार्ता.) – येथील बसस्‍थानकाच्‍या प्रवेशद्वाराजवळच घाणीचे साम्राज्‍य पसरले आहे. प्‍लास्‍टिकच्‍या बाटल्‍या, पिशव्‍या, चिखल आणि बसस्‍थानकावर उघड्यावर करण्‍यात येत असलेले मूत्रविसर्जन यांमुळे बसस्‍थानकावर अत्‍यंत अस्‍वच्‍छता असून दुर्गंधी पसरली आहे. पिण्‍याच्‍या पाण्‍याचे नळ तुटले आहेत. नळावर पाणी पिण्‍यासाठी पेल्‍याची व्‍यवस्‍था नाही. पाणी पिणार्‍यास किळस वाटेल, अशी नळाखाली घाण साचली आहे, या आणि अशा अनेक समस्‍या दूर करून स्‍थानकाची स्‍वच्‍छता करण्‍यात यावी, या मागणीचे निवेदन हिंदु जनजागृती समितीच्‍या ‘सुराज्‍य अभियाना’च्‍या वतीने राज्‍य परिवहन महामंडळाचे सोलापूर विभागीय वाहतून अधीक्षक सदाशिव कदम यांना देण्‍यात आले. या प्रसंगी जी.एस्.टी. सल्लागार श्री. गणेश वास्‍ते, उद्योगपती श्री. किशोर पुकाळे, श्री. निखिल बोगा, सुराज्‍य अभियानाचे श्री. दत्तात्रय पिसे आदी उपस्‍थित होते. श्री. सदाशिव कदम यांनी ‘निवेदनात दिल्‍याप्रमाणे सुधारणा करण्‍यासाठी प्रयत्न करू’, असे सांगितले.