(म्हणे) ‘मंदिरांमध्ये महिला पुजार्‍यांना अनुमती दिली पाहिजे !’ – नीलम गोर्‍हे, उपसभापती, विधान परिषद

नगर – राज्य सरकार ८ मार्च या महिलादिनी नवीन महिला धोरण अमलात आणणार आहे. त्यासाठी लोकप्रतिनिधींनी अभ्यास करून मसुदा सरकारकडे दिला पाहिजे, तर शिंगणापूर या ठिकाणी जसे महिलांना चौथर्‍यावर जाऊन पूजा करण्याचा मान मिळतो, त्याप्रमाणे तुळजापूर आणि कोल्हापूर येथील मंदिरांमध्ये पुरुष पुजार्‍यांच्या बरोबरीने महिलांनाही पुजारी म्हणून अनुमती दिली पाहिजे, अशी मागणी विधान परिषदेच्या उपसभापती डॉ. नीलम गोर्‍हे यांनी नगरमध्ये पत्रकार परिषदेत केली.

नीलम गोर्‍हे पुढे म्हणाल्या की, महिलांना नोकरी करतांना आरक्षण वयोमर्यादा वाढवून द्यावी, वृद्ध महिलांच्या समस्यांचे निराकरण करण्यासाठी स्वतंत्र व्यवस्था करावी, ‘शक्ती’ कायद्याची कार्यवाही करावी. कोरोना काळात अनेक महिला विधवा झाल्या, तर शेतकरी आत्महत्या करत असल्यामुळे त्यांचे कुटुंबीय उघड्यावर पडले आहेत. त्यामुळे साईबाबा संस्थानने अशा मुलांसाठी शैक्षणिक साहाय्य, निवासी संकुल उभारून त्यांना आर्थिक साहाय्य करण्याची आवश्यकता आहे, अशी काही सूत्रे नव्याने समाविष्ट करण्याच्या लेखी सूचना केल्या आहेत.