भीमाशंकर भाविकांसाठी प्रवेशिका (पास) घेण्याचा सक्तीचा निर्णय प्रशासनाने मागे घेतला !

पुणे – भीमाशंकर मंदिर १५ जूनपासून भाविकांसाठी खुले करण्यात आले आहे. मंदिर भाविकांसाठी खुले करतांना सुरक्षा आणि विकासकामात अडथळा येऊ नये, यासाठी ऑनलाईन पासधारक भाविकांनाच दर्शन घेण्याची सुविधा चालू करण्यात आली होती; मात्र गेल्या काही दिवसांमध्ये भाविकांच्या गर्दीचा अंदाज घेऊन प्रशासनाने दर्शनासाठी प्रवेशिका (पास) घेण्याचा सक्तीचा निर्णय मागे घेतला आहे. त्यानुसार सकाळी ७ ते ११ या कालावधीत १८ जूनपासून सर्व भाविकांना कोणत्याही ‘ऑनलाईन पास’ किंवा तिकिटाविना विनामूल्य दर्शन घेण्यात येणार आहे, तसेच ज्या भाविकांना तातडीने दर्शन घ्यायचे असेल, त्यांना २२ जूनपासून त्र्यंबकेश्वरच्या धर्तीवर अडीच सहस्र रुपयांमध्ये ‘तात्काळ दर्शन’ सुविधा दिली जाणार आहे, अशी माहिती जिल्हाधिकारी जितेंद्र डुडी यांनी दिली.

दुपारनंतर मंदिराचे काम होणार आहे. महिनाभरात भाविकांच्या गर्दीचा अंदाज घेऊन दुपारी १ वाजेपर्यंत दर्शनासाठी वेळ वाढवण्याचा प्रशासनाचा विचार आहे, असेही डुडी यांनी स्पष्ट केले.