विमान प्रवास १० टक्क्यांनी महागण्याची चिन्हे !

‘डेल्टा एअरलाइन्स’ या जागतिक विमान आस्थापनाचा दावा

अ‍ॅटलांटा (अमेरिका) – जागतिक विमान आस्थापन ‘डेल्टा एअरलाइन्स’ने रशिया आणि युक्रेन यांच्यातील युद्धाचा परिणाम म्हणून वाढत चाललेल्या तेलाच्या किमतीमुळे विमान प्रवास १० टक्क्यांनी महाग होऊ शकतो, याचे सूतोवाच केले आहे. युद्ध चालू झाल्यापासून तेलाची किंमत ही गेल्या १४ वर्षांतील सर्वाधिक असल्याचे वृत्त आहे. एमिरेट्स, जपान एअरलाइन्स आणि एअर एशिया या मोठ्या विमान आस्थापनांनी आधीच अधिभार लावून विमान भाडे वाढवले आहे. ‘डेल्टा एअरलाइन्स’ आस्थापनाचे प्रमुख एड बॅस्टेन यांनी सांगितले, ‘आमच्या आस्थापनाच्या आंतरराष्ट्रीय प्रवास करणार्‍या विमानांचे भाडेही १० टक्क्यांहून अधिकने महागणार आहे.’ युरोपचे सर्वांत मोठे विमान आस्थापन ‘र्‍यान एअर’नेही विमान भाड्यात वाढ होण्याचे संकेत दिले आहेत.

Airline giant Delta warns oil increases mean higher ticket prices https://t.co/fKG6Fbr8C8

— BBC News (World) (@BBCWorld) March 18, 2022

कोरोना महामारीच्या आधी वर्ष २०१९ मध्ये ‘डेल्टा एअरलाइन्स’मधून प्रवास करणार्‍यांची संख्या ही २० कोटींहून अधिक होती. प्रवासींच्या संख्येचा विचार करता हे आस्थापन जगातील दुसरे सर्वांत मोठे विमान आस्थापन आहे.