गेली ४५ वर्षे बंद असलेले भीलवाडा (राजस्थान) येथील श्री देवनारायण मंदिर उघडण्यासाठी हिंदूंचा १७ किलोमीटर लांब मोर्चा !

अशा प्रकारे खटले न्यायालयात वर्षानुवर्षे प्रलंबित रहात असतील, तर जनतेला न्याय कसा मिळणार ? – संपादक

भीलवाडा (राजस्थान) – येथील ४५ वर्षे बंद असलेले श्री देवनारायण मंदिर उघडण्यात यावे आणि तेथे पूजा करण्याची अनुमती मिळावी, अशी मागणी हिंदूंकडून करण्यात आली आहे. यासाठी १४ मार्च या दिवशी १७ किलोमीटर लांब मोर्चा काढण्यात आला होता. त्यानंतर प्रशासनाला निवेदन देण्यात आले.

या मोर्चाचे नेतृत्व सवाईभोज महंत सुरेशदास, नीलकंठ महादेव मंदिराचे महंत दीपकपुरी, मालासेरीचे पुजारी हेमराज पोसवाल आणि देवनारायण संघर्ष समितीचे संयोजक उदयलाल भडाणा यांनी केले. या मोर्चापूर्वी, म्हणजे ११ मार्च या दिवशी गोपालसिंह गुर्जर बस्सी नावाच्या एका तरुणाने या मंदिराचे टाळे तोडले हेते. यानंतर त्याच्या विरोधात गुन्हा नोंदवण्यात आला होता.