सातारा येथे स्वातंत्र्यवीर सावरकर यांच्या नातीकडून शिवप्रभूंच्या आरतीचे गायन !

सातारा, २२ फेब्रुवारी (वार्ता.) – १९ फेब्रुवारी या दिवशी हिंदवी स्वराज्य संस्थापक श्रीमंत छत्रपती शिवाजी महाराज यांची जयंती संपूर्ण भारतामध्ये मोठ्या उत्साहात साजरी करण्यात आली. शहरातील शिवतीर्थावर छत्रपती शिवाजी महाराज यांचे थेट वंशज छत्रपती उदयनराजे भोसले यांच्या हस्ते शिवप्रभूंची महाआरती पार पडली. ही आरती स्वातंत्र्यवीर सावरकर यांची नात विनता जोशी यांनी स्वत: गायली. विशेष म्हणजे या आरतीची रचना स्वत: स्वातंत्र्यवीर विनायक दामोदर सावरकर यांनी केली आहे.