अमरनाथ यात्रेपूर्वी जम्मू-काश्मीरमधून आतंकवाद्याला अटक

श्रीनगर (जम्मू-काश्मीर) – अमरनाथ यात्रा ३ जुलैपासून चालू होत आहे. त्या पार्श्वभूमीवर जम्मू-काश्मीर पोलिसांना मोठे यश मिळाले आहे. पोलिसांनी कठुआमधून हाजी लतीफ नावाच्या आतंकवाद्याला अटक केली आहे. हाजी लतीफ हा गेल्या २० वर्षांपासून जैश-ए-मंहमद (महंमद यांची सेना) आणि लष्कर-ए-तोयबा (सदाचरणी लोकांची सेना) या आतंकवादी संघटनांसाठी काम करत असल्याचा आरोप आहे.

१. त्याने अनुमाने १२ हून अधिक पाकिस्तानी आतंकवाद्यांना भारतीय सीमेत घुसखोरी करण्यास साहाय्य केले होते.

२. तो पाकिस्तानची गुप्तहेर संघटना ‘आय.एस्.आय.’च्या (‘इंटर सर्व्हिसेस इंटेलिजन्स’च्या, म्हणजे आंतरसेवा गुप्तचर यंत्रणेच्या) अधिकार्‍यांशीही थेट जोडलेला होता. तो भारतात घुसलेल्या आतंकवाद्यांना लपण्यासाठी ठिकाणे आणि वाहने पुरवायचा. अटकेनंतर सुरक्षायंत्रणा त्याची कसून चौकशी करत आहेत.

३. अमरनाथ यात्रेच्या सुरक्षेसाठी संपूर्ण जम्मू-काश्मीरमध्ये अतिरिक्त सैनिक तैनात करण्यात आले आहेत. भाविकांची यात्रा सुरक्षित व्हावी, यासाठी ठिकठिकाणी ‘मॉक ड्रिल’ (आतंकवादी घटनेचा सामना करण्यासाठीचा पूर्व सराव) केले जात आहेत.