पंढरपूर कॉरिडॉरचे काम कुणावरही अन्याय न करता योग्य पुनर्वसन करून पूर्ण करणार ! – देवेंद्र फडणवीस, मुख्यमंत्री

(‘कॉरिडॉर’ म्हणजे प्रशस्त आणि मोठा मार्ग)

पंढरपूर (जिल्हा सोलापूर) – श्री विठ्ठल-रुक्मिणीच्या दर्शनासाठी प्रतिवर्षी वाढणारी भक्तांची गर्दी पहाता त्यांना उत्तम सोयी उपलब्ध करून देण्यासाठी मंदिर परिसर विकासाचे काम पंढरपूर कॉरिडॉरच्या माध्यमातून करण्यात येणार आहे. कुणावरही अन्याय न करता सर्वांचे योग्य पुनर्वसन करून हे काम येत्या अडीच वर्षांत पूर्ण करण्यात येईल, अशी ग्वाही मुख्यमंत्री देवेंद्र फडणवीस यांनी येथे दिली.

आषाढ शुक्ल एकादशीच्या निमित्त श्री विठ्ठल-रुक्मिणीची शासकीय महापूजा मुख्यमंत्री फडणवीस यांनी सपत्नीक, तसेच मानाचे वारकरी बाबासाहेब माने, सौ. प्रभावती माने यांच्या समवेत केली. त्यानंतर श्री विठ्ठल-रुक्मिणी मंदिरे समितीच्या वतीने झालेल्या सत्कारप्रसंगी ते बोलत होते. या वेळी पालकमंत्री जयकुमार गोरे यांसह विविध मान्यवर उपस्थित होते.

मुख्यमंत्री फडणवीस म्हणाले की,

१. मागील काळात चालू केलेले मंदिर विकासाचे काम बहुतांश पूर्ण झाले आहे. पांडुरंगाचे दर्शन घेण्यासाठी लाखो लोक येतात. येथे अत्यंत अल्प जागा आहे. आता मोठी जागा सिद्ध करणे आवश्यक आहे.

२. कॉरिडॉर विकासामुळे येथील व्यावसायिकांचा व्यवसाय वाढेल, नागरिकांना घरे मिळतील, भाडेकरूंची व्यवस्था होईल, अशा पद्धतीने त्याची रचना करण्यात आली आहे. हे काम पूर्ण झाल्यानंतर कितीही भाविक आले, तरी अतिशय उत्तम व्यवस्था या ठिकाणी होईल.

३. या वेळी वारीने नवा उच्चांक गाठला आहे. यावर्षी २५ किलोमीटरहून अधिक लांबीची दर्शनासाठी रांग लागली होती.

४. चंद्रभागेचे पाणी स्वच्छ राहील, याची काळजी घेण्यात आली आहे. या वेळी पालकमंत्र्यांनी वाळवंटात अतिशय सुंदर व्यवस्था केल्यामुळे तेथील कचरा, विष्ठा आदी संपूर्ण स्वच्छता झाली आहे.

५. आपला प्रतिनिधी म्हणून मी केलेली ही पूजा संपूर्ण महाराष्ट्रातील आणि जगभरातील पांडुरंगाच्या भक्तांच्या वतीने केलेली पूजा आहे.

प्रारंभी श्री विठ्ठल-रुक्मिणी मंदिरे समितीचे सह-अध्यक्ष गहिनीनाथ महाराज औसेकर यांनी प्रास्ताविकात म्हटले की, विठुमाऊलीच्या दर्शनासाठीच्या रांगेचे अत्यंत चांगल्या प्रकारे व्यवस्थापन केले आहे. दर्शन रांगेत ५० ते ६० सहस्र वारकरी असले, तरी पालकमंत्र्यांनी राज्यशासन आणि प्रशासन यांच्या माध्यमातून अत्यंत चांगल्या सुविधा केल्यामुळे दर्शन सुसह्य झाले.