Yemen Attack : ‘अरामको’ या जगातील सर्वांत मोठ्या तेल आस्थापनावर आक्रमण

रियाध (सौदी अरेबिया) – येमेनने सौदी अरेबियावर केलेल्या क्षेपणास्त्र आणि ड्रोन आक्रमणांमध्ये जिझान औद्योगिक शहरातील ‘अरामको’ आस्थापनाशी संबंधित एका तेल सुविधा केंद्राची हानी झाली. या आक्रमणानंतर अनेक भागांतील वीजपुरवठा खंडित झाला. यान्बू प्रांतासाठी आणीबाणीची चेतावणी देण्यात आली. येमेनच्या आक्रमणाला प्रत्युत्तर म्हणून २४ जुलैच्या रात्री सौदी अरेबियाने येमेनमधील हुती बंडखोरांचे नियंत्रण असलेल्या होदेदाह शहरावर आक्रमण केले. यावर हुती परराष्ट्र मंत्रालयाने ‘सौदीला या आक्रमणाची मोठी किंमत मोजावी लागेल’, अशी चेतावणी दिली आहे. त्यामुळे येमेन आणि सौदी या दोन्ही देशांमधील तणाव पुन्हा एकदा शिगेला पोचला आहे.