काँग्रेसची विधान परिषद मतफुटीप्रकरणाची चौकशी कागदावरच !

नागपूर – विधान परिषद निवडणुकीतील लाजिरवाणी मतफुटी आणि उमेदवारांनी घेतलेली संशयास्पद माघार यांप्रकरणी प्रदेश काँग्रेसने स्थापन केलेली चौकशी समिती कागदावरच राहिली आहे. १५ दिवसांचा कालावधी उलटूनही काँग्रेसचे खासदार डॉ. कल्याण काळे आणि आमदार भाई जगताप यांची ही समिती विदर्भात फिरकली नाही. यामुळे स्थानिक कार्यकर्ते संतप्त आहेत. ७ जुलै या दिवशी समिती घोषित करण्यात आली होती. ‘संबंधित नेत्यांना वेळ नसेल, तर प्रदेश काँग्रेसने तातडीने दुसरी समिती नेमावी’, अशी मागणी करण्यात येत आहे. संतप्त पदाधिकार्‍यांनी थेट अखिल भारतीय काँग्रेस समितीकडे ई-मेल पाठवून या सर्व प्रकाराची तक्रार केली असून दोषींवर तातडीने कठोर कारवाईची मागणी केली आहे.

स्थानिक स्वराज्य संस्था मतदारसंघाच्या निवडणुकीत विदर्भात काँग्रेसची नाचक्की झाली. चंद्रपूर-गडचिरोली-वर्धा मतदारसंघात काँग्रेसचे अधिकृत उमेदवार शैलेश अग्रवाल यांनी माघार घेतल्याने भाजपचे उमेदवार बिनविरोध विजयी झाले. भंडारा येथे माजी आमदार दिलीप बनसोड आणि यवतमाळ येथे साहेबराव कांबळे यांनी अचानक आवेदन मागे घेतल्याने शिवसेनेचे उमेदवार बिनविरोध निवडून आले. अमरावतीत काँग्रेस उमेदवार ऐनवेळी रुग्णालयात भरती झाले, तर नागपूर येथे पक्षाला हक्काची मतेही िटकवता आली नाहीत.