कलियुगातील भगवान परशुरामाचे अंशावतार असलेले पू. भार्गवराम प्रभु (सनातनचे पहिले बालसंत, वय ९ वर्षे) यांची आध्यात्मिक वैशिष्ट्ये !

उद्या, वैशाख शुक्ल दशमी (२६.४.२०२६) या दिवशी सनातनचे पहिले बालसंत पू. भार्गवराम भरत प्रभु यांचा ९ वा वाढदिवस आहे. त्यानिमित्त सुश्री मधुरा भोसले यांना मिळालेले सूक्ष्मातील ज्ञान येथे देत आहोत. 

(भाग १)

पू. भार्गवराम भरत प्रभु यांना ९ व्या वाढदिवसानिमित्त सनातन परिवाराच्या वतीने कृतज्ञतापूर्वक नमस्कार !

१. पू. भार्गवराम हे कलियुगातील भगवान परशुरामाचे अंशावतार असणे

‘पू. भार्गवराम यांच्या जन्मानंतर त्यांच्यामध्ये भगवान परशुरामाचा एक दिव्यांश सामावला. त्यामुळे पू. भार्गवराम हे कलियुगातील भगवान परशुरामाचे अंशावतार आहेत. त्यांचा जन्म भारताच्या पवित्र ‘परशुरामभूमी’त झाला असून ‘त्यांना परशुरामाचे ‘भार्गवराम’, हे नाव प्राप्त होणे’, हे ईश्वरी नियोजन होते. पू. भार्गवराम यांच्यामध्ये भगवान परशुरामाचे ब्राह्मतेज आणि क्षात्रतेज दोन्ही आहेत. त्यामुळे जेव्हा सूक्ष्म युद्ध चालू असते, तेव्हा ते क्षात्रतेजाच्या बळावर, म्हणजे सूक्ष्मातील शस्त्रे आणि अस्त्रे यांनी अनिष्ट शक्तींशी लढतात, तसेच ते ब्राह्मतेजाच्या बळावर साधक आणि समाजातील व्यक्ती यांना योग्य मार्गदर्शन करून त्यांच्या साधनेला गती देतात.

२. पू. भार्गवराम प्रभु यांचा विविध युगांतील साधनाप्रवास !

३. पू. भार्गवराम प्रभु यांची विविध गुणवैशिष्ट्ये !

३ अ. पू. भार्गवराम यांचे मन मानस सरोवराप्रमाणे अत्यंत शुद्ध आणि निर्मळ आहे.

३ आ. चित्तवृत्ती स्थिर असणे : पू. भार्गवराम यांच्या अंतरात श्रीविष्णूच्या परशुरामरूपी अंशाचा वास असल्यामुळे त्यांचे चित्त, म्हणजेच अंतर्मन अत्यंत शांत आणि स्थिर आहे.

३ इ. बृहस्पतींप्रमाणे प्रगल्भ बुद्धी : पू. भार्गवराम यांच्या वयाच्या मानाने त्यांची बुद्धी अत्यंत तीक्ष्ण आणि देवगुरु बृहस्पतींच्या बुद्धीप्रमाणे अत्यंत प्रगल्भ अन् मेधावी आहे.

३ ई. प्रीती आणि समष्टी भाव : पू. भार्गवराम यांच्यातील प्रीती आणि समष्टी भाव यांच्यामुळे ते केवळ मनुष्याशीच नव्हे, तर निसर्गातील पंचतत्त्वांशी चटकन जोडले जाऊन एकरूप होतात. त्यामुळे त्यांच्याविषयी केवळ मनुष्यालाच नव्हे, तर पशू-पक्ष्यांनाही पुष्कळ आत्मीयता आणि प्रीती जाणवते.

३ उ. साक्षीभाव : पू. भार्गवराम जरी शांत असले किंवा स्थुलातून एखाद्या लीलेत व्यस्त असले, तरी ते साक्षीभावाच्या दृष्टीने स्थूल आणि सूक्ष्म, अशा दोन्ही स्तरांवर घडणार्‍या अनेक घटना पहात असतात. यावरून त्यांच्यातील ‘साक्षीभाव’, या दुर्मिळ गुणाची अनुभूती येते.

३ ऊ. त्रिकालद्रष्टा : पू. भार्गवराम यांना केवळ वर्तमानकाळातीलच नव्हे, तर भूतकाळ आणि भविष्यकाळ यांच्याशी संबंधित घटनांचेही ज्ञान आहे. ते ‘त्रिकालद्रष्टा’ म्हणून पुढे नावलौकिक प्राप्त करतील.

३ ए. क्षमाशील आणि मुक्तीदाता : पू. भार्गवराम हे त्यांच्या संपर्कात येणार्‍या अनेक जिवांशी सूक्ष्मातून संभाषण करत असतात. काही जणांनी पू. भार्गवराम यांना मागील जन्मांत त्रास दिलेला आहे. पृथ्वीच्या वायूमंडलात भटकणार्‍या आणि मुक्तीसाठी तडफडणार्‍या भूत, प्रेत, पिशाच इत्यादींसह पशू-पक्ष्यांच्या रूपातील अनेक पापी जिवांना पू. भार्गवराम क्षमादान देतात अन् त्यांना योग्य प्रायश्चित्त घेण्यास सांगतात, तसेच ज्यांच्या मुक्तीची वेळ जवळ आलेली आहे, त्यांना मुक्तीही देतात.

३ ऐ. परम उद्धारक : पू. भार्गवराम अनेक जिवांना स्थूल आणि सूक्ष्म, अशा दोन्ही स्तरांवर मार्गदर्शन करून अन् दिव्य सत्संग देऊन साधनेचा मार्ग दाखवतात अन् त्यांचा उद्धार करतात.

३ ओ. मनात असत्य आणि अधर्म यांविषयी चीड असणे : पू. भार्गवराम यांच्या मनात असत्य आणि अधर्म यांच्याविषयी पुष्कळ चीड आहे. त्यामुळे ते भविष्यात पृथ्वीवर रामराज्यरूपी धर्मराज्याची स्थापना करण्यासाठी असत्य आणि अधर्म यांच्या विरोधात कणखरपणे उभे राहून यशस्वी लढा देणार आहेत.

३ औ. लढाऊ वृत्ती आणि युद्धकौशल्य : भगवान परशुरामाचा अंश असल्यामुळे पू. भार्गवराम यांच्यात लढाऊ वृत्ती आहे, तसेच त्यांना साक्षात् परशुरामच सूक्ष्मातून लढण्यासाठी मार्गदर्शन करत असल्याने त्यांच्यामध्ये अधर्माशी लढण्याचे अलौकिक युद्धकौशल्य आहे. त्यामुळे त्यांना श्रीमन्नारायणाच्या हातातील सुदर्शनचक्र, शारंग धनुष्यबाण, कौमुदी गदा आणि परशुरामाच्या हातातील परशु ही शस्त्रे प्रिय आहेत. ‘लढाऊ वृत्ती आणि युद्धकौशल्य’ या अवतारी गुणांच्या आधारे ते रामराज्य किंवा धर्मराज्य यांच्या मार्गातील समस्त विघ्नांचा निःपात करून धर्मसंस्थापनेचा मार्ग निष्कंटक करणार आहेत.

४. पू. भार्गवराम यांच्या संदर्भात साधकांसह समाजालाही अनुभूती येत असणे आणि पुढेही येणार असणे

पू. भार्गवराम यांच्यामध्ये त्यांच्या मागील जन्मांतील सर्व गुणवैशिष्ट्ये विद्यमान आहेत. काळाच्या आवश्यकतेनुसार त्यांच्यातील दिव्यता आणि विविध गुणवैशिष्ट्ये वेळोवेळी प्रगट होत आहेत अन् पुढेही होणार आहेत. त्यामुळे केवळ साधकच नव्हे, तर समाजातील विविध सात्त्विक लोकांनाही पू. भार्गवराम यांच्या संदर्भात अनेक प्रकारच्या दैवी अनुभूती येत आहेत आणि पुढेही येणार आहेत.’

(क्रमशः)

– सुश्री मधुरा भोसले (सूक्ष्मातील ज्ञानप्राप्तकर्त्या साधिका, आध्यात्मिक पातळी ६५ टक्के), सनातन आश्रम, रामनाथी, गोवा. (४.४.२०२६)

भाग २ वाचण्याकरिता येथे क्लिक करा : https://sanatanprabhat.org/marathi/1034126.html