मोशी येथील कचरा आगार दुर्घटनेच्या संदर्भात आस्थापनाच्या विरोधात गुन्हा नोंद करण्याचे आदेश !

पिंपरी – मोशी येथील कचरा आगार दुर्घटनेच्या संदर्भात प्राथमिक चौकशीचे काम तातडीने पूर्ण करावे आणि संबंधित आस्थापनाच्या विरोधात गुन्हा नोंद करावा, अशी सूचना पिंपरी-चिंचवड महापालिकेचे आयुक्त डॉ. विजय सूर्यवंशी यांनी अधिकार्‍यांना केली. डॉ. सूर्यवंशी यांनी दुर्घटनेच्या संदर्भात महापालिकेतील वरिष्ठ अधिकार्‍यांची बैठक घेतली. या दुर्घटनेत अडकलेल्या सर्व कामगारांचे शोधकार्य पूर्ण झाल्याने बचाव मोहीम थांबवली आहे. या घटनेच्या संदर्भात महापालिकेचा पर्यावरण विभाग, तसेच ‘अँटोनी लारा रिन्यूएबल’ या संबंधित ठेकेदार आस्थापनाला नोटीस देण्यासह या दुर्घटनेचे सखोल अन्वेषण करण्याचा आदेश आयुक्तांनी दिला आहे.