हिंदुद्वेषी काँग्रेसचे नेते सचिन सावंत यांच्याकडून ‘रामचरितमानस’मधील ओळींचा विपर्यास !

महाराष्ट्र अर्थसंकल्पीय अधिवेशन

मुंबई – महायुती सरकारने विधानसभेत संमत केलेल्या ‘धर्मस्वातंत्र्य अधिनियम २०२६’ या विधेयकावर काँग्रेसने आक्षेप घेतला. काँग्रेसचे सचिव सचिन सावंत यांनी या कायद्याच्या नावातच विरोधाभास असल्याचे सांगत ‘हे विधेयक राज्यघटनेच्या विरोधात आहे’, असे अकलेचे तारे तोडले आहेत. या वेळी धर्मांतर रोखणार्‍या कायद्याला खीळ घालण्याचा प्रयत्न त्यांनी केला, तसेच त्यांनी ‘रामचरितमानस’मधील ओळींचा विपर्यासही केला. या कायद्यातील प्रावधाने धार्मिक ध्रुवीकरण करणारी आहेत, अशी टीकाही त्यांनी या वेळी केली. (‘लव्ह जिहाद’ आणि इतर मार्ग या माध्यमांतून हिंदूंचे सर्रास धर्मांतर होत असतांना त्याविषयी साधा ‘ब्र’ही न काढणारे काँग्रेसचे नेते सचिन सावंत यांना ‘धर्मस्वातंत्र्य विधेयका’वर बोलण्याचा अधिकार आहे का ? – संपादक)

सावंत म्हणाले की, मतांच्या राजकारणासाठी अल्पसंख्याकांना लक्ष्य करण्याच्या प्रयत्नात ‘हिंदु धर्माचे तुष्टीकरण’ भाजप तर करत आहेच; पण आपली मनुवादी विचारधाराही अधोरेखित करत आहे. महिला आणि अनुसूचित जाती-जमातींविषयीची भाजपची मानसिकता ही वर्णभेद करणारी आहे, असा आरोपही त्यांनी केला.

हे विधेयक नागिरकांचा स्वतःचा जीवनसाथी निवडण्याचा अधिकार हिरावून घेणारे आहे. १८ वर्षांवरील व्यक्तीला मतदानाचा अधिकार आहे, मग त्यांना स्वतःचा निर्णय घेण्यापासून रोखणे चुकीचे आहे. बळजोरीने होणार्‍या धर्मांतराला विरोध असला पाहिजे; मात्र या विधेयकात वापरलेली ‘भोळीभाबडी व्यक्ती’ ही संज्ञा अस्पष्ट आहे. सरकारने याची व्याख्या स्पष्ट करावी. सज्ञान व्यक्तीला केवळ धर्मांतराचा समुपदेश दिला, तर दुसर्‍या व्यक्तीला गुन्हेगार ठरवणे अयोग्य आहे. ‘व्यक्ती आणि कुटुंबे आर्थिक दुर्बलतेमुळे धर्मांतराला बळी पडतात’, असे सरकारचे म्हणणे असेल, तर त्यांची ही दुर्बलता दूर करण्यासाठी शासन काय प्रयत्न करणार आहे ? असा प्रश्न सावंत यांनी उपस्थित केला. (‘भोळीभाबडी व्यक्ती’ या शब्दावरून तांत्रिक वाद घालण्यापेक्षा आमिषे आणि फसवणूक करून होणारे हिंदूंचे धर्मांतर थांबवणे, हे अधिक महत्त्वाचे आहे. हिंदूंच्या रक्षणासाठी घेतलेल्या निर्णयाला ‘धार्मिक ध्रुवीकरण’ म्हणणे हा काँग्रेसच्या जुन्याच धोरणाचा भाग आहे ! – संपादक)