कर्नाटक : न्यायाधिशांच्या खुर्चीवर करणी केल्याच्या आरोपा प्रकरणी महिलेला अटक

चिक्कबळ्ळापुर (कर्नाटक) – स्वतःच्या बाजूने निकाल लागावा, यासाठी एका महिलेने न्यायाधिशांच्या खुर्चीवर करणी केल्याचा आरोप करण्यात आला. या प्रकरणी चिक्कबळ्ळापुर शहर पोलिसांनी मंजुळा (वय ६५ वर्षे) या महिलेला अटक केली आहे. चिक्कबळ्ळापुर शहरातील वलसण्णा गल्लीत रहाणारी मंजुळा हिने वरिष्ठ दिवाणी न्यायाधीश तथा प्रथम वर्ग न्यायदंडाधिकारी यांच्या खुर्चीवर मंत्रोच्चारासह पांढरी मोहरी टाकून करणी केल्याचा आरोप झाला होता. ही घटना न्यायालयातील ‘सीसीटीव्ही’मध्ये चित्रित झाली होती. या घटनेविषयी न्यायालयाच्या मुख्य प्रशासकीय अधिकारी नेत्रा यांनी दिलेल्या तक्रारीवरून चिक्कबळ्ळापुर शहर पोलीस ठाण्यात आरोपी महिलेच्या विरोधात गुन्हा नोंदवण्यात आला होता. पोलिसांनी ‘कर्नाटक अमानवीय दुष्ट प्रथा आणि जादूटोणा विरोधी कायदा-२०१७’च्या अंतर्गत आरोपीला अटक केली. अटक करण्यात आलेल्या मंजुळाला न्यायालयात उपस्थित केले असता तिला १४ दिवसांची न्यायालयीन कोठडी सुनावण्यात आली आहे.