Iran US War : इराणचे हॉर्मुझमध्ये तेलवाहू नौकेवर आक्रमण : १ भारतीय ठार

तेहरान (इराण) – संयुक्त अरब अमिरातच्या संरक्षण मंत्रालयाने दिलेल्या माहितीनुसार हॉर्मुझच्या सामुद्रधुनीत ओमानच्या जलक्षेत्राजवळ त्यांच्या २ तेलवाहू नौकांवर इराणच्या क्षेपणास्त्रांनी मारा केला. ‘मोम्बासा’ आणि ‘अल बाहिया’ अशी नावे असलेल्या या नौकांवर झालेल्या आक्रमणात १ भारतीय ठार झाला, तर ७ जण घायाळ झाले. दुसरीकडे इराणच्या ‘इस्लामिक रिव्होल्युशनरी गार्ड कॉर्प्स’ने क्षेपणास्त्रे आणि ड्रोन यांचा वापर करून बहरीनमधील ‘अल-जुफैर’ सैनिकी तळ आणि अमेरिकेच्या ‘५ व्या ताफ्या’चे मुख्यालय यांच्यावर आक्रमण केल्याचा दावा केला आहे. याव्यतिरिक्त त्यांनी जॉर्डनमधील वायूदलाच्या एका तळावरील अमेरिकी सैन्य आणि महत्त्वाची सैनिकी आस्थापने यांना लक्ष्य करून बॅलिस्टिक क्षेपणास्त्रेही डागली आहेत.

🚨 Hormuz Flashpoint: Global Tensions Explode!

Iran attacks an oil tanker in the Strait of Hormuz, killing 1 Indian. India has sought clarification from the Iranian Embassy expressing deep concern.

UAE condemns the strike.

The US retaliates after attacks on its bases in… pic.twitter.com/aGGCqA5zOO

— Sanatan Prabhat (@SanatanPrabhat) July 14, 2026

अमेरिकेच्या ‘सेंट्रल कमांड’ने माहिती दिली की, इराणवर करण्यात आलेल्या आक्रमणात बुशेहर, चाबहार, जास्क, कोनारक, अबू मुसा आणि बंदर अब्बास येथील सैनिकी तळांना लक्ष्य करण्यात आले. सध्या आखातामध्ये अमेरिकेचे ५० सहस्रांहून अधिक सैनिक तैनात आहेत.

संयुक्त अरब अमिरातकडून निषेध !

संयुक्त अरब अमिरातने इराणच्या आक्रमणांचा तीव्र शब्दांत निषेध केला असून हे आंतरराष्ट्रीय कायद्याचे उघड उल्लंघन आणि प्रादेशिक सुरक्षेला धोका असल्याचे म्हटले आहे. या वाढत्या कारवायांना प्रत्युत्तर देण्याचा अधिकार आम्ही राखून ठेवतो, असे अमिरातने स्पष्ट केले.

हॉर्मुझमधून जाणार्‍या नौकांकडून २० टक्के कर वसूल करणार ! – ट्रम्प यांची घोषणा  

अमेरिकेचे राष्ट्राध्यक्ष डॉनल्ड ट्रम्प यांनी म्हटले आहे की, हॉर्मुझची सामुद्रधुनी (दोन जलाशयांना जोडणारा जलमार्ग) उघडी राहील आणि तिच्या सुरक्षेचे दायित्व अमेरिकेचे असेल. स्वतःला ‘हॉर्मुझ सामुद्रधुनीचा संरक्षक’ संबोधत ट्रम्प यांनी सांगितले की, या कामाचा खर्च भागवण्यासाठी सामुद्रधुनीतून जाणार्‍या सर्व मालावर २० टक्के कर आकारला जाईल. इराणी नौका आणि त्याचे ग्राहक यांच्यावरील बंदी कायम राहील; परंतु इतर सर्व देशांच्या नौका कोणत्याही अडथळ्याविना हॉर्मुझमधून जाऊ शकतील. या नवीन व्यवस्थेवरील काम तात्काळ प्रारंभ केले जाईल.

हॉर्मुझवरील नियंत्रण सोडणार नाही ! – इराण

ट्रम्प यांच्या घोषणेचा इराणने तीव्र निषेध केला. इराणी सैन्याच्या खातम अल-अंबिया मुख्यालयाच्या प्रवक्त्याने सांगितले की, हॉर्मुझच्या सामुद्रधुनीमध्ये अमेरिकेचा कोणताही हस्तक्षेप स्वीकारार्ह नाही. या सागरी मार्गाचे संरक्षण आणि व्यवस्थापन करण्याचा अधिकार इराणला आहे आणि त्याचे संरक्षण करण्यासाठी इराण प्रत्येक पाऊल उचलेल. आम्ही हॉर्मुझवर नियंत्रण कायम ठेवू. अमेरिकेच्या हस्तक्षेपापुढे आणि दबावापुढे झुकणार नाही.