UP Poster Row : मथुरा (उत्तरप्रदेश) येथे ‘हृदयात बाबर, मुखात राम’, असा फलक लावल्यामुळे समाजवादी पक्षाचे नेते संतप्त !

मथुरा (उत्तरप्रदेश) – येथील गोवर्धन चौकाजवळ एका फलकावर समाजवादी पक्षाचे संस्थापक मुलायम सिंह यादव आणि राष्ट्रीय अध्यक्ष अखिलेश यादव हे गोल टोपी घातलेले दाखवून ‘हृदयात बाबर, मुखात राम’, असे लिहिलेला फलक लावल्याचे दिसून आले. यामुळे समाजवादी पक्षाचे नेते संतप्त झाले. यासह या फलकावर अखिलेश यादव यांनी केलेले ‘अयोध्येत रात्रीच्या अंधारात मूर्ती ठेवल्या गेल्या होत्या’, हे वक्तव्य छापण्यात आले आहे. यासह त्यांचे वडील मुलायम सिंह यादव यांनी पूर्वी केलेले ‘बाबरीसाठी अयोध्येत आणखी कारसेवकांना मारावे लागले असते, तर मारले असते’, हे विधानही छापले आहे. अखिलेश यादव यांनी राममंदिरात दान चोरी झाल्याचा आरोप प्रथम केला होता. त्याविषयी ते सात्याने आरोप करीत आहेत. या पार्श्वभूमीवर त्यांना प्रत्युत्तर देणारा हा फलक लावण्यात आला आहे.

समाजवादी पक्षाचे जिल्हाध्यक्ष वीरेंद्र यादव यांनी या प्रकरणी आम्ही संबंधितांविरुद्ध कठोर कायदेशीर कारवाई करण्याची मागणी करणार आहोत, असे सांगितले.